اقوام متحدہ ڈرون حملے بند کرائے پاکستان کا سلامتی کونسل میں پھر احتجاج

ڈرون حملے انسانی حقوق کی کھلم کھلا خلاف ورزی ہے، امریکا اور اسرائیل پاکستان، یمن اور غزہ میں ایسے حملوں کا قانونی جواز فراہم کریں،عام شہریوں کی ہلاکتوں پر شدید تحفظات ہیں، نیوی پلے کا خطاب۔ فوٹو: فائل

---

اقوام متحدہ کی سلامتی کونسل میںپاکستان نے ایک بارپھر ڈرون حملوں کوملکی خودمختاری اورسلامتی کی صریحاً خلاف ورزی قراردیتے ہوئے سلامتی کونسل میں شدید احتجاج کیا ہے جبکہ اقوام متحدہ کی ہائی کمشنر برائے انسانی حقوق نیوی پلے نے کہا ہے کہ مسلح ڈرون حملے انسانی حقوق کی کھلم کھلاخلاف ورزی ہے۔

تفصیلات کے مطابق اقوام متحدہ میں پاکستانی مندوب مسعودخان نے سلامتی کونسل میں پاکستان پر ہونیوالے امریکی ڈرون حملوںکا معاملہ ایک بارپھر اٹھایا اور کہا کہ پاکستان ڈرون حملوں کے معاملے پر سیکریٹری جنرل بانکی مون کے خیالات کی مکمل تائید کرتا ہے۔ اقوام متحدہ پاکستان کی خود مختاری کا احترام کرتے ہوئے امریکااور اتحادیوں پر دباؤ ڈالے کہ وہ ڈرون حملے بند کریں۔



اے پی پی کے مطابق اقوام متحدہ کی ہائی کمشنر برائے انسانی حقوق نیوی پلے نے کہا ہے کہ مسلح ڈرون حملے انسانی حقوق کی کھلم کھلاخلاف ورزی ہے۔ امریکااور اس کا دیرینہ اتحادی اسرائیل پاکستان، یمن اورغزہ میں ایسے حملوں کا قانونی جوازفراہم کریں۔ سلامتی کونسل میں تنازعات کے دوران شہریوں کے تحفظ کے حوالے سے منعقدہ اجلاس کے دوران خطاب میں نیوی پلے نے کہا کہ انسداد دہشتگردی اور فوجی آپریشنزکے نام پر کیے جانیوالے ان حملوں کے نتیجے میں عام شہریوں کی ہلاکتوں پر شدیدتحفظات ہیں۔ عالمی ادارہ اس حوالے سے موثراقدام کرے۔غیرشفاف ڈرون حملوں نے نظریہ احتساب کو بری طرح متاثر کیا ہے جہاں ان حملوں سے متاثرہ افراد کے ازالے کے بھی آثار کہیں نظر نہیں آتے۔