جہاز فُل ہوگیا اب جگہ نہیں، ایئر بلیو انتظامیہ نے مسافر کو واپس بھیج دیا

 کراچی: ائر بلیو انتظامیہ نے جدہ کے کنفرم ٹکٹ کے حامل مسافر کو فلائٹ اوور بک ہونے کی وجہ سے سفر سے محروم کردیا۔

ذرائع کے مطابق سول ایوی ایشن اتھارٹی کی غفلت کے سبب نجی ایئرلائنز بھی من مانی پر اتر آئیں، اس کی تازہ مثال اتوار کے روز جناح ٹرمینل پر دیکھنے کو ملی جب نجی ائر لائن ائر بلیو نے جدہ جانے والی پرواز پی اے 170 کو اووربک کردیا اور نتیجے میں ایک مسافر کو واپس کردیا گیا جو اپنے خاندان والوں کے ساتھ باقاعدہ ٹکٹ خرید کر پرواز کے لیے آیا تھا، ایئر لائن عملے کی جانب سے وجہ بتائی گئی کہ جہاز میں جگہ نہیں ہے۔

ذرائع کے مطابق ایک ہی خاندان کے 17 افراد نے ٹکٹ خریدے تھے تاہم جگہ نہ ہونے کا جواز پیش کرکے ان میں سے ایک مسافر کو روک لیا گیا جس پر خاندان کے تمام افراد نے ایئر بلیو انتظامیہ کے رویے کے خلاف چیک ان کاونٹر پر احتجاج بھی کیا۔