زمبابوے کے مثبت کھیل نے پاکستانی قائد کو حیران کردیا

ذہن میں 260 کا ہدف تھا،آفریدی نے آخر میں شاندار کہیل کا مظاہرہ کیا۔ فوٹو: فائل

---

زمبابوین بیٹسمینوں کے مثبت کھیل نے مصباح کو حیران کردیا، ان کا کہنا ہے کہ ٹیلر کو وکٹ پر ڈٹے دیکھ کر فکرمندی بڑھنے لگی تھی، اگلے میچ میں ہمیں مزید بہتر پرفارم کرنا ہوگا۔

مین آف دی میچ محمد حفیظ کا کہنا ہے کہ ہمارے ذہن میں 260 کا ہی ہدف تھا شاہد آفریدی نے آخر میں زیادہ بہتر اسکور تک پہنچایا، عمر امین نے پراعتماد بیٹنگ کی۔ تفصیلات کے مطابق دوسرے ون ڈے میں 90 رنز کی کامیابی کے باوجود کپتان مصباح الحق زمبابوین بیٹسمینوں کے مثبت کھیل سے حیران اور قدرے پریشان بھی ہیں، ان کے ہاتھوں انھیں پہلے میچ میں 7 وکٹ سے شکست ہوچکی ہے، میڈیا سے بات چیت میں مصباح نے کہا کہ اس بار بھی کنڈیشنز کا اندازہ لگانا آسان نہیں تھا، پچ بظاہر سبز دکھائی دے رہی تھی مگر دوسری اننگز میں یہ زیادہ بہتر ہوگئی، پہلی میں بھی یہ بیٹنگ کیلیے اچھی رہی، عمر امین اچھا کھیلا جبکہ آفریدی نے بہتر اختتام کیا، دوسری اننگز میں کنڈیشنز بہتر ہونے سے 299 ہمارے بولرز کیلیے اچھا ثابت ہوا، میزبان بیٹسمینوں نے دانشمندی سے بیٹنگ کی۔



یہی بات فکرمندی کا باعث تھی مجھے صرف ایک وکٹ گرنے کا انتظار تھا اور جیسے ہی ٹیلر آئوٹ ہوئے باقی زمبابوین ٹیم پر دبائو بڑھ گیا، ہم ہفتے کے میچ میں بھی بہتر کھیل پیش کرنے کیلیے پُرامید ہیں مگر ہمیں اس میں زیادہ بہتر انداز میں پرفارم کرنا ہوگا۔ محمد حفیظ نے کہا کہ مجھے اپنی ٹیم کیلیے اہم موقع پر رنز بنانے پر کافی خوشی ہے، ہم جانتے تھے کہ پہلے بیٹنگ کافی دشوار ہوگی، ابتدائی20 اوورز میں زمبابوین بولرز نے درست ایریا میں بولنگ کی، عمر امین کی میرے ساتھ شراکت اچھی رہی اور آخر میں شاہد آفریدی کی جارحانہ بیٹنگ نے اسکور کو بہتر بنایا، ہمارا اندازہ 300 کا نہیں بلکہ 260 تک کا تھا،عمر امین نے پُراعتماد بیٹنگ کی، میں نے بھی سینئر ہونے کے ناطے اس کی حوصلہ افزائی کی، ہم یہ میچ ہر صورت جیتنا چاہتے تھے، بعد میں پچ تھوڑی تبدیل ہوگئی مگر ہمارے بولرز نے اپنا کردار بخوبی نبھایا۔