قبائلی اضلاع میں انتخابات تمام پولنگ اسٹیشنز کے اندر فوج تعینات کرنے کا فیصلہ واپس

اجلاس میں صوبائی الیکشن کمشنر،ڈی آر اوز و دیگر کی شرکت،تمام پولنگ اسٹیشنز پر سی سی ٹی وی کیمرے لگانے کی ہدایت فوٹو:فائل

---

الیکشن کمیشن نے قبائلی اضلاع میں انتخابات کے دوران تمام پولنگ اسٹیشنز کے اندر فوج تعینات کرنے کا فیصلہ واپس لے لیا لہٰذا اب فوج صرف حساس ترین پولنگ اسٹیشنز کے اندر ہی تعینات ہوگی جبکہ علاقے میں نافذ دفعہ 144 بھی ختم کر دی گئی۔

الیکشن کمیشن نے انتخابات میں شفافیت یقینی بنانے کے لیے تمام پولنگ اسٹیشنز کے اندر فوج تعینات کرنے کا فیصلہ تبدیل کیا، گزشتہ روز الیکشن کمیشن میں اہم اجلاس ہوا جس میں صوبائی الیکشن کمشنر، خیبر پختونخوا کے ڈی آر اوز اور سیکیورٹی حکام نے شرکت کی۔

الیکشن کمیشن کے مطابق اب تمام پولنگ اسٹیشنز کے باہر تو فوج بدستور تعینات رہے گی لیکن اندر تعیناتی صرف انتہائی حساس پولنگ اسٹیشنز تک محدود کر دی گئی ہے۔ قبائلی اضلاع میں نافذ دفعہ 144 بھی ختم کر دی گئی تاکہ امیدواروں کو الیکشن مہم میں درپیش مشکلات کا خاتمہ ہو سکے۔

الیکشن کمیشن نے تمام پولنگ اسٹیشنز پر سی سی ٹی وی کیمرے نصب کرنے کی بھی ہدایت کرتے ہوئے کہا کہ 20 جولائی کو ہونے والے انتخابات کے لیے تمام ضروری اقدامات مکمل کر لیے گئے ہیں۔