صوبے میں 7 نئی جیلوں کی فوری تعمیر کی منظوری 8 ہزار قیدیوں کی گنجائش ہوگی

وزیر اعلیٰ نے سمری منظور کرلی، جیلیں کراچی،ٹھٹھہ،میرپور خاص،بینظیر آباد(نواب شاہ)، کشمور اور دادو میں قائم کی جائیں گی۔ فوٹو: اے ایف پی/فائل

---

حکومت سندھ نے صوبے بھر میں 7 نئی جیلوں کی فوری تعمیر کی منظوری دے دی، ان جیلوں میں 8 ہزار قیدیوں کو رکھنے کی گنجائش ہوگی، جیلوں میں سیکیورٹی کے فول پروف انتظامات کیے جائیں گے۔

ذرائع کے مطابق محکمہ جیل خانہ جات نے وزیر اعلیٰ سندھ کو ایک سمری ارسال کی تھی جس میں سندھ میں نئی جیلوں کی تعمیر کی سفارش کی گئی تھی، وزیر اعلیٰ نے اس سمری کو منظور کرلیا ہے، ذرائع نے بتایا کہ سندھ میں نئی جیلیں کراچی، ٹھٹھہ، میرپور خاص، بینظیر آباد (نواب شاہ)، کشمور اور دادو میں قائم کی جائیں گی اور ان جیلوں کی تعمیر پر 2 ارب روپے خرچ کیے جائیں گے۔



یہ جیلیں آئندہ 3 برس میں مرحلہ وار تعمیر کی جائیں گی،کراچی میں قائم کی جانے والی جیل میں 2 ہزار اور دیگر جیلوں میں ایک ایک ہزار قیدیوں کو رکھنے کی گنجائش ہوگی، جیلوں کے اطراف 16 سے 18 فٹ کی کنکریٹ کی دیواریں قائم کی جائیں گی اور تمام جیلوں میں سی سی ٹی وی کیمرے اور موبائل جیمرز بھی نصب کیے جائیں گے، ذرائع نے بتایا کہ جیلوں میں قیدیوں کو تمام بنیادی سہولیات فراہم کی جائیں گی ۔پہلے مرحلے میں کراچی اور کشمور میں نئی جیلوں کی تعمیر کے کام کا آغاز رواں برس نومبر میں شروع کردیا جائے گا جو ایک برس میں مکمل ہوگا۔