امیر طارق زمان پاکستان کرکٹ بورڈ کے سیکریٹری مقرر

امیر طارق کا ابتدائی کام عدالتی فیصلے کے مطابق ذکا اشرف کے دور میں بھرتی کئے گئے 89غیر ضروری ملازمین کو فارغ کرنا ہو گا۔ فوٹو: فائل

---

وزارت بین الصوبائی رابطہ نے امیر طارق زمان خان کو پاکستان کرکٹ بورڈ کا سیکریٹری مقرر کردیا ہے، وہ آئندہ چند روز میں اپنی ذمہ داریاں سنبھالیں گے۔

حکومت نے اسلام آباد ہائی کورٹ کے تفصیلی فیصلے پر عمل درآمد شروع کر دیا، اور امیر طارق زمان خان کی بطور سیکریٹری تقرری بھی اسی عدالتی فیصلہ کا نتیجہ ہے، ان کا پہلا کام سابق چیئرمین بورڈ ذکا اشرف کے دور میں بھرتی کئے گئے 89 غیر ضروری ملازمین کی چھانٹی کرنا ہو گا، اس کے بعد وہ دیگر روز مرہ امور بھی دیکھیں گے، ان کے تقرر کو پاکستان کرکٹ میں حکومتی مداخلت کی پہلی مثال تصور کیا جا رہا ہے اور ان کے آنے سے الیکشن جیسے معاملات میں چھایا جمود بھی ختم کیا جا سکے گا۔

ذرائع کے مطابق امیر طارق زمان کی تقرری کے بعد کرکٹ بورڈ کے نگراں چیئرمین نجم سیٹھی کے مستقل چیئرمین بننے کا امکان معدوم ہوگیا ہے اور عدالت میں جب کبھی پیشی ہوئی انھیں خاصے مسائل کا سامنا کرنا پڑے گا، ایک جانب وہ اختیارات نہ ہونے کا رونا روتے رہتے ہیں تو دوسری جانب انھوں نے سپر لیگ جیسے بڑے منصوبے شروع کرنے کا اعلان بھی کیا ہے، اس سے واضح ہوگیا کہ ان کے مقاصد طویل المدت ہیں۔ ذرائع کا مزید کہنا ہے کہ آئندہ آنے والے چند دنوں میں پی سی بی میں بڑے پیمانے پر تبدیلیاں ہوسکتی ہیں، بغیر کوئی کام کیے لاکھوں روپے وصول کرنے والے نان ٹیکنیکل افراد اور برسوں سے سفارش کے بل بوتے پر بورڈ میں بیٹھے چند آفیشلز کی چھٹی ممکن ہے، ماضی میں کوئی ان پر ہاتھ نہیں ڈال سکتا تھا کیونکہ عدالت جانے کا خدشہ ہوتا، اب چونکہ اس کا زیادہ امکان نہیں لہذا بورڈ میں آپریشن کلین اپ متوقع ہے۔