بھارت کشمیر میں انسانی حقوق اور معمولات زندگی کو فی الفور بحال کرے اقوام متحدہ

بھارت وادی بھر غیر اعلانیہ کرفیو اور لاک ڈاؤن ختم کرے، ترجمان روپرٹ کلویلی (فوٹو : فائل)

---

اقوام متحدہ کے ہائی کمشنر برائے انسانی حقوق نے مقبوضہ کشمیر میں انسانی حقوق کی سنگین خلاف ورزیوں پر تشویش کا اظہار کرتے ہوئے قابض مودی حکومت کو فی الفور انسانی حقوق کی بحالی کا مطالبہ کیا ہے۔

اقوام متحدہ کے ہائی کمشنر برائے انسانی حقوق کے ترجمان روپرٹ کلویلی نے اپنے ایک بیان میں کہا ہے کہ تنظیم کو مقبوضہ کشمیر کی صورت حال پر گہری تشویش ہے، وادی میں انسانی حقوق معطل ہیں اور شہریوں کو ان کے جائز حقوق سے محروم رکھا جارہا ہے۔

ترجمان روپرٹ کلویلی نے مزید کہا کہ بھارتی حکومت مقبوضہ کشمیر میں لاک ڈاؤن ختم کر کے معمولات زندگی کو فی الفور بحال کرے اور بنیادی انسانی حقوق کی فراہمی کو یقینی بنائے۔

"We urge the Indian authorities to unlock the situation & fully restore the rights that are currently being denied. Although some of the measures have been relaxed, their impact on human rights continues to be widely felt." @UNHumanRights on #Kashmir: https://t.co/Sn7b2nX23N pic.twitter.com/YRsT6IByVE

— United Nations Geneva (@UNGeneva) October 29, 2019

روپرٹ کلویلی نے مزید کہا کہ بھارت نے وادی بھر میں غیر اعلانیہ کرفیو نافذ کر رکھا ہے، اظہار رائے اور مذہبی آزادی پر قدغن لگائی گئی ہے، مواصلاتی نظام منقطع ہیں اور کاروباری سرگرمیاں ٹھپ ہیں۔

بیان میں مزید کہا گیا ہے کہ 5 اگست کے بھارتی اقدام کے بعد سے امن عامہ کی صورت حال بھی ابتر ہے، 6 افراد جاں بحق اور درجنوں زخمی ہوگئے ہیں جب کہ حریت اور سیاسی رہنماؤں کو بلا جواز حراست میں رکھا ہوا ہے۔