ہالی ووڈ کا ایک اور سپراسٹار کورونا کا شکار

لندن: ہالی ووڈ اداکار ٹام ہینکس کے بعد ایک اور ہالی ووڈ  اسٹار ادریس البا بھی کورونا وائرس کا شکار ہوگئے۔

47 سالہ اداکار ادریس البا جن کا پورا نام ادریسا آکونا البا ہے نے گزشتہ روز ٹوئٹر پر ایک ویڈیو شیئر کی جس کے ساتھ موجود پیغام میں انہوں نے لکھا آج صبح میرا سی او وی آئی ڈی-19 کا ٹیسٹ مثبت آیا ہے۔ تاہم میں بہتر محسوس کررہا ہوں۔ مجھ میں کورونا وائرس کی ابھی تک کوئی علامات ظاہر نہیں ہوئیں لیکن جب سے مجھ میں اس وائرس کی تشخیص ہوئی مجھے قرنطینہ کردیا گیا ہے۔

یہ بھی پڑھیں: آسکر ایوارڈ یافتہ اداکار ٹام ہینکس اور ان کی بیوی بھی کورونا وائرس کا شکار

ادریس البا نے لوگوں کو گھروں میں رہنے اور محتاط رہنے کی تاکید کرتے ہوئے کہا کہ میں اپنی صحت کی صورتحال کے حوالے سے آپ سب کو آگاہ کرتا رہوں گا، گھبرانے کی ضرورت نہیں ہے۔

https://twitter.com/idriselba/status/1239617034901524481

ادریس البا نے کورونا وائرس میں مبتلا ہونے کے بارے میں کہا کہ جمعہ کے روز اس بات کا پتہ لگنے کے بعد کہ کورونا وائرس میں مبتلا شخص کے ساتھ رابطہ ہونے کے بعد میرا ٹیسٹ کیا گیا۔ یہ سنجیدہ ہے اور اب وقت آگیا ہے کہ سماجی فاصلے کے بارے میں حقیقتاً سوچا جائے اور اپنے ہاتھوں کو دھوئیں۔

یہ بھی پڑھیں: کورونا وائرس کے باعث ’’مشن امپاسبل 7 ‘‘کی شوٹنگ معطل

واضح رہے کہ گزشتہ ہفتے ہالی ووڈ اداکار ٹام ہینکس اور ان کی اہلیہ ریٹا ولسن میں بھی کورونا وائرس کی تشخیص ہوئی تھی جس کے بعد دونوں نے خود کو قرنطینہ کرلیا تھا۔ ان کے علاوہ ’’گیم آف تھرونز‘‘کے اداکار کرسٹوفر ہیوجو اور سابق بانڈ گرل اولگا کری لینکو  بھی اس وائرس میں مبتلا ہوچکی ہیں۔

اس کے علاوہ اس وائرس کے خوف کے باعث ہالی ووڈ کی کئی فلموں کی شوٹنگ بھی روک دی گئی ہے جن میں ’’مشن امپاسبل7‘‘اور ’’میٹرکس4‘‘بھی شامل ہیں۔