آئی سی سی ورلڈ ٹی 20 کوالیفائر ٹورنامنٹ آئرلینڈ کے نام

ابوظبی: آئی سی سی ورلڈ ٹی ٹوئنٹی کوالیفائر کے فائنل میں آئرش بیٹسمین پال اسٹرلنگ چھکا لگارہے ہیں۔ فوٹو: آئی سی سی/گیٹی امیجز

---

آئی سی سی ورلڈ ٹی 20 کوالیفائرٹورنامنٹ آئرلینڈ نے جیت لیا، فائنل میں افغانستان کو 68رنز سے شکست ہوگئی۔نیپال نے یواے ای کو 5 وکٹ سے مات دے کر تیسری پوزیشن حاصل کی، آئندہ برس بنگلہ دیش میں شیڈول میگا ایونٹ کے ابتدائی رائونڈ کی لائن اپ مکمل ہوگئی۔

۔تفصیلات کے مطابق فیصلہ کن معرکے میں آئرش سائیڈ نے پہلے بیٹنگ کرتے ہوئے مقررہ 20 اوورز میں 7وکٹ پر 225 کا مجموعہ ترتیب دیا،پال اسٹرلنگ نے 76 اور ٹرینٹ جونسٹن نے 62 رنز بٹور کر ٹیم کو بڑے مجموعے تک رسائی دلائی، حمزہ ہوتک نے 3 اور شاپور زدران نے 2 کھلاڑیوں کو پویلین کی راہ دکھائی، افغان ٹیم 18.5 اوورز میں 157رنز بناکر آئوٹ ہوگئی، اوپنر محمد شہزاد 38 کے بعد گلبدین نائب کے 43رنز نمایاں رہے۔



ٹرینٹ جونسٹن نے 3 جبکہ جورج ڈوکریل، الیکس کوسیک اور ٹم مرٹیگ نے 2،2 کھلاڑیوں کو پویلین چلتا کیا۔اس سے قبل نیپال نے متحدہ عرب امارات کو 5وکٹ سے مات دیکر تیسری پوزیشن حاصل کی۔اسی کے ساتھ آئندہ برس بنگلہ دیش میں شیڈول میگا ایونٹ کے ابتدائی رائونڈ کی لائن اپ مکمل ہوگئی،کوالیفائر ایونٹ سے 6 ٹیموں نے ڈھاکا جانے کا پروانہ حاصل کیا،گروپ ' اے ' میں میزبان بنگلہ دیش کے ساتھ افغانستان، نیپال اور ہانگ کانگ کو جگہ ملی، زمبابوے کے ساتھ گروپ 'بی ' میں آئرلینڈ ، یواے ای اور نیدرلینڈز شامل ہیں۔