بھارت ؛ تیز رفتار ٹرین نے پٹری پر سوئے ہوئے 16 مزدوروں کو کچل دیا

نئی دہلی: بھارت میں ایک سامان بردار ٹرين نے پٹری پر سوئے ہوئے مزدوروں کو کچل دیا جس کے نتیجے میں 16 افراد ہلاک اور 20 زخمی ہوگئے۔

بھارتی میڈیا کے مطابق ریاست مہاراشٹرا کے ضلع اورنگ آباد میں سامان بردار ٹرین پٹری پر سوئے ہوئے 46 مزدوروں پر چل دوڑی، حادثے میں 16 مزدور ہلاک اور 20 سے زائد زخمی ہوگئے۔ ہلاک اور زخمی ہونے والوں کا تعلق مدھیہ پردیش سے ہے جو مزدوری کے لیے مہاراشٹرا آئے تھے۔

عینی شاہدین کا کہنا ہے کہ لاک ڈاؤن کی وجہ سے ٹرینوں کی آمد ورفت معطل ہیں اس لیے یہ مزدور چہل قدمی کے بعد پٹری پر ہی سو گئے تھے تاہم رات گئے ایک تیل بردار مال گاڑی نے سوئے ہوئے مزدوروں کو کچل دیا۔ زخمیوں کو اسپتال منتقل کردیا گیا ہے جہاں 5 کی حالت نازک بتائی جا رہی ہے۔

Extremely anguished by the loss of lives due to the rail accident in Aurangabad, Maharashtra. Have spoken to Railway Minister Shri Piyush Goyal and he is closely monitoring the situation. All possible assistance required is being provided.

— Narendra Modi (@narendramodi) May 8, 2020

16 مزدروں کی لاشوں کو مدھیہ پردیش ان کے گاؤں منتقل کردیا گیا ہے، بھارتی وزیر اعظم نریندر مودی نے ٹرین حادثے پر افسوس کا اظہار کرتے ہوئے مقامی انتظامیہ اور محکمہ ریلوے کو امدادی کاموں کو تیز تر کرنے اور زخمیوں کو فوری اور بہتر علاج فراہم کرنے کی ہدایت کی ہے۔