ملک میں کورونا کے 4 ہزار 339 نئے کیسز رپورٹ، 3892 مریض صحت یاب

 اسلام آباد: ملک بھر میں کورونا وائرس کے مریضوں کی تعداد میں اضافہ جاری ہے۔

نیشنل کمانڈ اینڈ آپریشن سینٹر کے مطابق کورونا وائرس کے مصدقہ مریضوں کی تعداد 2 لاکھ 17 ہزار 809 جبکہ مجموعی اموات کی تعداد 4473 ہو گئی ہے۔ گزشتہ 24 گھنٹوں میں مزید 78 اموات ہوئیں اور 4 ہزار 339 نئے کیسز رپورٹ ہوئے۔

کورونا سے صحتیاب ہونے والے مریضوں کی تعداد بھی تیزی سے بڑھنے لگی اور مزید 3892 مریضوں نے کورونا کو شکست دے دی جس کے بعد صحت یاب افراد کی تعداد ایک لاکھ 4 ہزار 694 افراد ہوگئی ہے۔

ملک میں مزید 22 ہزار 128 ٹیسٹ کیے گئے، اس طرح مجموعی طور پر 13 لاکھ 27 ہزار 638 ٹیسٹ کیے جاچکے ہیں۔

سندھ میں کورونا وائرس سے متاثرہ افراد کی تعداد 86 ہزار 795، پنجاب میں 77 ہزار 740، خیبرپختونخوا میں 26 ہزار 938، بلوچستان میں 10 ہزار 608، اسلام آباد میں 13 ہزار 82، آزاد جموں و کشمیر میں ایک ہزار 135 اور گلگت بلتستان میں کورونا مریضوں کی تعداد ایک ہزار 511 ہوگئی۔

کورونا وائرس اور احتیاطی تدابیر:

کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔