ناظم آباد میں سفاک ملزمان نے نوبیاہتا جوڑے کو بے دردی سے قتل کردیا

 کراچی: ناظم آباد میں سفاک ملزمان نے چھرے کے وار کرکے نو بیاہتا جوڑے کو بے دردی سے قتل کردیا۔

رضویہ کے علاقے ناظم آباد نمبر ایک میں گھر میں میاں اور بیوی کی لاشوں کی اطلاع پر پولیس کی بھاری نفری اور ریسکیو عملہ موقع پر پہنچ گیا، پولیس نے لاشوں کو عباسی شہید اسپتال منتقل کردیا۔

پولیس نے ابتدائی تفتیش کے دوران بتایا کہ اسپتال میں مقتول کی شناخت سلیم سائیں کے نام سے ہوئی ہے جب کہ اہلیہ کی شناخت 35سالہ عائشہ بی بی کے نام سے ہوئی، تفتیش کے دوران معلوم ہوا ہے کہ میاں اور بیوی کو نامعلوم ملزمان نے تیز دھارآلے کی مددسے گلہ کاٹ کر قتل کیا ہے اور اس واردات میں ایک سے زائد ملزمان شامل ہوسکتے ہیں۔

پولیس نے بتایا کہ مقتول سلیم سائیں نے 4 ماہ قبل خاتون سے پسند کی شادی تھی، جائے وقوع سے خون آلود چھرا برآمد کرلیا ہے، تفتیش کے دوران یہ بھی معلوم ہوا کہ مقتول سلیم سائیں کا اورنگی ٹاؤن میں آستانہ تھا۔

پولیس کا کہنا ہے کہ مذکورہ گھر گراؤنڈ پلس تو ہے جس میں ان کے علاو بھی فیملیاں رہائشی پذیر ہیں، ایک خاتون نے بتایا کہ علاقے میں لائٹ نہیں تھی اور گھرسے شور شرابے کی آوازیں آرہی تھی جب خاتون کے شوہر آئے تو انہوں نے جاکر دیکھا تو میاں اور بیوی کی لاشیں پڑی ہوئی تھیں جس کی اطلاع پولیس کو دی گئی تاہم پولیس واقعے کی مزید تفتیش کررہی ہے۔