گلو کار بلال سعید اور صبا قمر پر مقدمے کی درخواست، 12 اگست تک جواب طلب

اسٹاف رپورٹر  پير 10 اگست 2020
عدالت نے متعلقہ تھانے کے ایس ایچ اور سے 12 اگست کو جواب طلب کرلیا ہے۔ (فوٹو، فائل)

عدالت نے متعلقہ تھانے کے ایس ایچ اور سے 12 اگست کو جواب طلب کرلیا ہے۔ (فوٹو، فائل)

 لاہور: مسجد وزیر خان میں عکس بندی کے معاملے میں  گلوکاربلال سعید، صبا قمر اور محکمہ اوقاف کے افسروں کے خلاف اندراج مقدمہ کی درخواست پر سماعت میں 12 اگست تک رپورٹ طلب کرلی گئی ہے۔

تفصیلات کے مطابق ایڈیشنل سیشن جج عتیق الرحمن نے سردار فرحت منظور خان چانڈیو ایڈووکیٹ کی اندراج مقدمہ کی درخواست پر سماعت کی اور ایس ایچ او ا کبری گیٹ کو نوٹس جاری کر کے 12 اگست کو رپورٹ طلب کر لی ہے۔

یہ خبر بھی پڑھیے: صبا قمر اور بلال سعید کی مسجد میں گانے کی ویڈیو وائرل، سوشل میڈیا پھٹ پڑا

درخواست گزار نے مؤقف اختیار کیا ہے کہ  بلال سعید اور اداکارہ صبا قمر نے مسجد میں گانے کی عکس بندی کرکے تقدس پامال کیا ہے اور مسجد کی توہین اور کے تقدس کو پامال کرنے کی پوسٹیں سوشل میڈیا پر بھی شئیر کی گئی ہیں۔ درخواست گزار نے صبا قمر، بلال سعید، لائن پروڈیوسر احمد وقاص اور محکمہ اوقاف، کے خلاف مقدمہ درج کرنے کا حکم دینے کی استدعا کی ہے۔

یہ خبر بھی پڑھیے: گلوکار بلال سعید نے مسجد میں گانے کی ریکارڈنگ پر معافی مانگ لی

واضح رہے کہ مسجد وزیر خان میں عکس بندی کے معاملے پر سوشل میڈیا اور سیاسی وسماجی تنظمیوں کی جانب سے شدید تنقید کی گئی تھی اور وزیر اعلیٰ پنجاب عثمان بزدار بھی واقعے کا نوٹس لے چکے ہیں۔ تاہم گلو کار بلال سعید ٹوئٹر پر جاری کی گئی ویڈیو میں اس واقعے پر معافی بھی مانگ چکے ہیں۔

علاوہ ازیں سیکریٹری اوقاف پنجاب نے اس واقعے پر مینیجر سرکل 4 اشتیاق احمد کو معطل کردیا ہے اور  ڈائریکٹر فنانس عبدالوحید کو انکوائری آفیسر مقرر کر دیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔