وزیر اعظم کی زیر صدارت آئی ایس آئی ہیڈ کوارٹر میں اہم اجلاس

اسٹاف رپورٹر  اتوار 29 نومبر 2020
وزیر اعظم عمران خان آئی ایس آئی کے ہیڈکوارٹرز میں اعلیٰ سیاسی و عسکری قیادت کے اجلاس کی صدارت کررہے ہیں(فوٹو، ریلیز)

وزیر اعظم عمران خان آئی ایس آئی کے ہیڈکوارٹرز میں اعلیٰ سیاسی و عسکری قیادت کے اجلاس کی صدارت کررہے ہیں(فوٹو، ریلیز)

 راولپنڈی: وزیر اعظم کی زیر صدارت ملک کی سیاسی اور عسکری قیادت کا اہم اجلاس آئی ایس آئی  کے ہیڈ کوارٹر میں منعقد ہوا۔

اجلاس میں قومی سلامتی سے متعلق اہم امور پر مشاورت کی گئی اور اعلیٰ قومی اور عسکری قیادت کو علاقائی اور ملکی صورتحال پر تفصیل سے آگاہ کیا گیا۔

وزیر اعظم عمران خان نے وزیر خارجہ شاہ محمود قریشی، وزیر منصوبہ بندی اسد عمر، چیئرمین جوائنٹ چیفس آف اسٹاف کمیٹی جنرل ندیم رضا، چیف آف آرمی اسٹاف جنرل قمر جاوید باجوہ، چیف آف ائیر اسٹاف ائیر چیف مارشل مجاہد انور خان، چیف آف نیول اسٹاف ایڈمرل محمد امجد خان نیازی، چیف آف جنرل اسٹاف لیفٹیننٹ جنرل ساحر شمشاد مرزا کے ہمراہ ہیڈکوارٹرز آئی ایس آئی کا دورہ کیا۔

یہ بھی پڑھیں :ہمارا مقابلہ ایسی سیاسی قیادت سے ہے جس نے کبھی جمہوری جدوجہد نہیں کی، وزیراعظم

وزیر اعظم آفس کے مطابق ڈائریکٹر جنرل آئی ایس آئی لیفٹیننٹ جنرل فیض حمید نے ڈائریکٹوریٹ جنرل آئی ایس آئی میں شرکاء کا استقبال کیا۔اجلاس میں اعلیٰ قومی اور عسکری قیادت کو علاقائی اور ملکی صورت حال پر تفصیل سے آگاہ کیا گیا۔

وزیراعظم نے قومی سلامتی کو درپیش چیلینجز  کے خلاف آئی ایس آئی کی پیشہ ورانہ صلاحیتوں کو سراہا۔ اس موقعے پر ملکی سلامتی سے متعلق امور پر بریفنگ بھی دی گئی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔