سال نو پر ساحل جانیوالی کوئی سڑک بند نہیں کی جائیگی

اسٹاف رپورٹر  جمعرات 31 دسمبر 2020
بغیرسائلنسربائیک چلانے والے گرفتارہوں گے،ہیوی ٹریفک شام6بجے سے ٹریفک نارمل ہونے تک شہرمیں داخل نہیں ہوگی
 فوٹو: ایکسپریس

بغیرسائلنسربائیک چلانے والے گرفتارہوں گے،ہیوی ٹریفک شام6بجے سے ٹریفک نارمل ہونے تک شہرمیں داخل نہیں ہوگی فوٹو: ایکسپریس

 کراچی:  ٹریفک پولیس کا سال نو کے موقع پر بغیر ہیلمٹ، ٹوٹے ہوئے سائلنسر یا بغیر سائلنسر، ٹریفک قوانین کی خلاف ورزی کرنے والی گاڑیوں اور موٹرسائیکل چلانے والوں، غفلت اور لاپروائی  سے ڈرائیونگ کرنے والوں کے خلاف قانونی کارروائی کا فیصلہ کیا ہے۔

ترجمان ٹریفک پولیس کے مطابق31 دسمبر اور یکم جنوری کی درمیانی شب شہری نئے سال کی آمد پر مختلف تفریحی مقامات جیسے کلفٹن، باغ ابن قاسم  اور سی ویو کا رخ کریں گے،ٹریفک پولیس کی جانب سے شہریوں کے لیے کسی بھی سڑک کو بند نہیں کیا جارہا ہے، صرف سی ویو پر میک ڈونلڈ سے ولیج ریسٹورنٹ تک ٹریفک ون وے چلے گی، شہریوں سے اپیل ہے وہ ٹریفک قوانین کے مطابق مذکورہ  مقام کا رخ کریں ون وے ، تیز فتاری ، ٹریفک لین کی خلاف ورزی ہرگز نہ کریں تمام ہیوی ٹریفک جس میں واٹر ٹینکر ، ڈمپر ، ٹرالر، ٹرک شامل ہیں ان کو شام 6 بجے سے ٹریفک نارمل ہونے تک شہرمیں داخل ہونے کی اجازت نہیں ہوگی۔

ترجمان کے مطابق سی ویو روڈ،شارع فیصل،عبداللہ ہارون روڈ، ڈاکٹر ضیا الدین احمد روڈ، مائی کولاچی روڈ، کورنگی روڈ، اور ایم ٹی خان روڈ کسی بھی قسم کی پارکنگ کی اجازت نہیں ہوگی۔ بغیر ہیلمٹ، ٹوٹے ہوئے سائلنسر یا بغیر سائلنسر ،ٹریفک قوانین کی خلاف ورزی کرنے والی گاڑیوں اور موٹر سائیکل چلانے والوں ، غفلت اور لاپرواہی  سے ڈرائیونگ کرنے والوں کے خلاف  قانونی کاروائی کی جائے گی اور مزید قانونی کاروائی کے لیے انھیں مقامی پولیس کے حوالے کیا جائے گا۔

ترجمان نے کہا ہے کہ شہری زحمت اور پریشانی سے بچنے کیلئے  ٹریفک قوانین کا مطابق گاڑی چلائیں، ٹریفک سے متعلق کسی  بھی قسم کی مدد کیلئے ٹریفک پولیس ہیلپ لائن نمبر 1915 پر رابطہ کریں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔