سی ٹی ڈی کی سکھر میں کارروائی، دو مبینہ دہشت گرد ہلاک

اسٹاف رپورٹر  ہفتہ 27 فروری 2021
ہلاک دہشت گرد کے قبضے سے دو پستول اور ایک بیگ برآمد   فوٹو: فائل

ہلاک دہشت گرد کے قبضے سے دو پستول اور ایک بیگ برآمد فوٹو: فائل

 کراچی: سی ٹی ڈی سندھ اوروفاقی حساس ادارے کی سکھر میں مشترکہ کارروائی کے دوران فائرنگ کے تبادلے میں کالعدم تنظیم کے دو مبینہ دہشت گرد ہلاک ہو گئے جن کے قبضے سے دو پستول اور ایک بیگ برآمد کر لیا گیا۔

جمعے اور ہفتے کی درمیان شب سی ٹی ڈی سندھ اور وفاقی حساس ادارے نے سکھر میں تھانہ پٹنی کے علاقے میں دہشت گردوں کی اطلاع پر چھاپہ مارا تو وہاں پہلے سے موجود دہشت گردوں نے پولیس پر فائرنگ شروع کردی جس پر سی ٹی ڈی سندھ اور حساس ادارے کے اہلکاروں نے پورے علاقے کو گھیرے میں لے لیا اور جوابی فائرنگ کی جس کے نتیجے میں دو دہشتگردوں کو زخمی حالت میں گرفتار کر لیا گیا جنہیں فوری طور پر تعلقہ اسپتال روھڑی اسپتال منتقل کردیا گیا جہاں دونوں زخمی دوران علاج ہلاک ہوگئے۔

اس حوالے سے انچارج سی ٹی ڈی مظہر مشوانی نے بتایا کہ ہلاک ہونےوالے ملزمان کی شناخت ولایت زیب ولد نوران زیب اور شاہ محمود ولد پیوند خان کے نام سے کر لی گئی ہے جن کا تعلق کالعدم تنظیم تحریک طالبان پاکستان سے ہے۔

انھوں نے بتایا کہ مقابلے میں مارے جانے والے دہشت گردوں کا پوسٹ مارٹم بھی مکمل کر لیا گیا ہے جن کے قبضے سے دو پستول اور ایک بیگ بھی ملا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔