جولائی تا دسمبر حکومت نے اسٹیٹ بینک سے 612 ارب روپے کے قرضے لیے

نجی شعبے259 ارب اورپبلک انٹرپرائززنے40 ارب کے قرضے لیے۔ فوٹو: فائل

---

حکومت نے رواں مالی سال کے پہلے 6ماہ کے دوران بجٹ سپورٹ کے لیے اسٹیٹ بینک سے 612ارب روپے کے قرضے حاصل کیے، سابقہ حکومت نے اسی دور میں 143ارب روپے کے قرضوں کی ادائیگی کی تھی، 6ماہ کے دوران زیر گردش کرنسی کی مالیت میں 230ارب روپے کا اضافہ ہوا ہے۔

اسٹیٹ بینک کے اعدادوشمار کے مطابق رواں مالی سال یکم جولائی سے 27 دسمبر تک اسٹیٹ بینک سے 6کھرب 12ارب 43کروڑ روپے کے قرضے حاصل کیے گئے، گزشتہ مالی سال کے اسی عرصے میں حکومت نے اسٹیٹ بینک کو 1 کھرب43 ارب 16کروڑ روپے کے قرضے لوٹائے تھے، اس عرصے کے دوران زیرگردش نوٹوں کی مالیت میں 2کھرب29ارب 91کروڑ روپے کا اضافہ عمل میں آیا، گزشتہ مالی سال کے اسی عرصے کے دوران زیر گردش نوٹوں کی مالیت میں 2کھرب18ارب 96کروڑ روپے کا اضافہ ہوا تھا، اس اضافے کے بعد زیر گردش نوٹوں کی مالیت 21کھرب68ارب 13کروڑ 40لاکھ روپے تک پہنچ گئی، زیر تبصرہ عرصے میں زر کے پھیلاؤ کی شرح 5.47 فیصد رہی جو گزشتہ مالی سال کے دوران 7.01فیصد رہی تھی، بینکوں کے بیرونی اثاثوں میں 2کھرب 16 ارب 38کروڑ روپے کی کمی واقع ہوئی، گزشتہ سال کے اسی عرصے میں بینکوں کے نیٹ فارن ایسٹس20ارب 7کروڑ روپے سے بڑھے تھے۔



بینکوں کے مجموعی مقامی اثاثوں کی مالیت میں 700ارب 66 کروڑ کا اضافہ ہوا، گزشتہ سال 515ارب 40کروڑ روپے کا اضافہ رہا تھا، رواں مالی سال کے دوران حکومت نے شیڈول بینکوں کو 18ارب 55کروڑ روپے کے قرضے لوٹائے ہیں جبکہ گزشتہ مالی سال کے اسی عرصے میں حکومت پر شیڈول بینکوں کے 726ارب 99کروڑ روپے واجب تھے، غیر سرکاری شعبے کو قرضوں کا حجم 107ارب 61 کروڑ روپے کے مقابلے میں 299ارب روپے تک پہنچ گیا جس میں نجی شعبے کو دیے گئے 258ارب 96کروڑ روپے اور پبلک سیکٹر انٹرپرائزز کو دیے گئے 40ارب 25 کروڑ روپے کے قرضے شامل ہیں، گزشتہ سال کے اسی عرصے میں نجی شعبے کو 73ارب 20کروڑ روپے اور پبلک سیکٹر انٹرپرائزز کو 34 ارب 54 کروڑ روپے کے قرضے دیے گئے تھے۔

حکومت کی جانب سے کموڈیٹی آپریشن کی مد میں لیے گئے 94ارب 85کروڑ روپے کے قرضے لوٹائے گئے، گزشتہ سال اس مد میں 38 ارب 3کروڑ روپے کے قرضے واپس کیے گئے تھے، رواں مالی سال کی پہلی ششماہی میں حکومت کی خالص قرض گیری 497 ارب 19کروڑ روپے رہی جبکہ گزشتہ مالی سال کے اسی عرصے میں حکومت کی خالص (نیٹ) قرض گیری 544ارب 77کروڑ روپے رہی تھی۔