بھارت میں کورونا کی بگڑتی صورتحال؛ کنگنا بھی پاکستانیوں کی ہمدردی کی معترف

 ممبئی: بھارت میں کورونا کی بگڑتی صورتحال پر اداکارہ کنگنا رناوت بھی پاکستانیوں کی ہمدردی کی معترف ہوگئیں۔

بھارت میں کورونا وائرس کی تیسری لہر انتہائی خطرناک ثابت ہوئی ہے اور وہاں روزانہ کی بنیاد پر ایک لاکھ سے زائد کیسز رپورٹ ہورہے ہیں جب کہ ہر 4 منٹ میں ایک شخص اس وائرس سے ہلاک ہورہا ہے ایسے میں پاکستان سمیت دنیا بھر سے بھارتی عوام کے لیے نیک خواہشات کا اظہار کیا جارہا ہے۔

وزیراعظم عمران خان نے بھی اپنے پیغام میں بھارتی عوام سے ہمدردی کا اظہار کرتے ہوئے کہا کہ بھارتی شہری کورونا کی خطرناک لہر سے نمٹ رہے ہیں، بھارت سمیت دنیا بھر میں کورونا متاثرین کی صحت یابی کے لئے دعاگو ہوں۔

I want to express our solidarity with the people of India as they battle a dangerous wave of COVID-19. Our prayers for a speedy recovery go to all those suffering from the pandemic in our neighbourhood & the world. We must fight this global challenge confronting humanity together

— Imran Khan (@ImranKhanPTI) April 24, 2021

اس سے قبل ایدھی فاؤنڈیشن کے سربراہ فیصل ایدھی بھی بھارت کو مدد کی پیشکش کرچکے ہیں۔ اپنے بیان میں انہوں نے بھارت کو 50 ایمبولنس اور رضاکار بھجوانے کی پیشکش کی تھی۔

خیال رہے بھارت میں ریکارڈ کورونا کیسز کے باعث  گزشتہ روز پاکستان میں ٹوئٹر پر #PakistanStandWithIndia کا ہیش ٹیگ ٹاپ ٹرینڈز میں شامل رہا جس نے پاکستان مخالف سوچ رکھنے والے بالی ووڈ اداکاروں کو بھی تعریف کرنے پر مجبور کردیا۔

Heartwarming to see top trend from Pakistan #PakistanstandswithIndia #भारत_का_वीर_पुत्र_मोदी provided the country with vaccine nice to see them appreciate his kindness and reciprocate with love, we too acknowledge their empathy in these testing times #भारत_का_वीर_पुत्र_मोदी

— Kangana Ranaut (@KanganaTeam) April 24, 2021

اپنے متنازع اور پاکستان مخالف بیانیہ کی وجہ سے خبروں میں رہنے والی اداکارہ کنگنا رناوت نے ٹوئٹ کرتے ہوئے کہا ’’پاکستانیوں کی جانب سے #PakistanstandwithIndia کا ٹاپ ٹرینڈ دیکھ کر اچھا لگا، ہم بھی اس مشکل وقت میں ان کہ اس ہمدردی کے معترف ہیں‘‘۔

واضح رہے بھارت میں کورونا کے مریضوں کی تعداد ایک کروڑ 68 لاکھ سے تجاوز کر چکی ہے اور ہلاکتوں کی تعداد بھی ایک لاکھ 28 ہزار سے زائد ہے۔