بلدیاتی الیکشن ملتوی نیا شیڈول جاری کیا جائےسپریم کورٹ

الیکشن شیڈول منسوخ کرنیکا نوٹیفکیشن جاری، قوانین میں ترمیم اور حلقہ بندیوں کے بعد نیا شیڈول جاری ہوگا۔ فوٹو: فائل

---

لاہور: سپریم کورٹ نے پنجاب اور سندھ میں بلدیاتی الیکشن کی تاریخوں میں توسیع کی الیکشن کمیشن کی متفرق درخواست منظورکرتے ہوئے نیا انتخابی شیڈول جاری کرنے کی اجازت دیدی جس کے بعد الیکشن کمیشن نے پرانا انتخابی شیڈول منسوخ کردیا۔

چیف جسٹس تصدق جیلانی کی سربراہی میں3 رکنی بینچ نے مقدمے کی سماعت کی۔ اس موقع پر سیکریٹری الیکشن کمیشن اشتیاق احمد خان اور ایڈیشنل اٹارنی جنرل شاہ خاور پیش ہوئے اور بتایا کہ سندھ ہائیکورٹ نے بلدیاتی الیکشن کا قانون جبکہ لاہور ہائیکورٹ نے حلقہ بندیاں کالعدم کر دی ہیں، فیصلے کے بعد نئی حلقہ بندیاں ابھی نہیں ہوئیں جبکہ الیکشن کمیشن کو بیلٹ پیپرز اور سیاہی کی عدم دستیابی سمیت دیگر مسائل کا بھی سامنا ہے، اس صورت میں 13نومبرکو سپریم کورٹ کے احکام کے مطابق جاری شیڈول پر الیکشن کرانا ممکن نہیں۔ایکسپریس نیوزکے مطابق الیکشن کمیشن کا کہنا تھا کہ سندھ اور لاہور ہائیکور ٹ کے تفصیلی فیصلے آنے کے بعد مقررہ تاریخوں پر بلدیاتی انتخابات کا انعقاد ممکن نہیں ۔چیف جسٹس نے کہا جو شیڈول سپریم کورٹ کے احکامات پر جاری کیا گیا وہ بھی الیکشن کمیشن کی تجویزکردہ تاریخوں کے مطابق تھا، پنجاب اور سندھ کے علاوہ کنٹونمنٹ بورڈز اور اسلام آباد میں انتخابات کی کیا صورتحال ہوگی۔

سیکریٹری الیکشن کمیشن نے کہاکہ کہ کل بلائے گئے اجلاس میں اس بارے میں فیصلہ کیا جائیگا۔ ایڈیشنل اٹارنی جنرل نے کہاکہ لاہور اور سندھ ہائیکورٹس کے فیصلوںکے بعد الیکشن کمیشن کیلیے موجودہ شیڈول کے تحت انتخابات کرانا ممکن نہیں رہا ۔ سپریم کورٹ نے فیصلے میں قرار دیا کہ تمام حالات کو مدنظر رکھتے ہوئے الیکشن کمیشن کو اجازت دی جاتی ہے کہ وہ موجودہ شیڈول واپس لیکر مناسب اقدامات کے بعد نیا شیڈول جاری کرے، مزید سماعت فروری کے پہلے ہفتے تک ملتوی کردی گئی۔



دریں اثنا جسٹس انور ظہیر جمالی کی سربراہی میں ڈویژن بینچ نے بلدیاتی انتخابات جماعتی بنیادوں پر کرانے کے فیصلے کیخلاف اپیل کی سماعت ملتوی کردی۔ عدالت کو بتایا گیا کہ لاہور ہائیکورٹ نے مختصر حکم جاری کیا تھا تفصیلی فیصلہ آنا باقی ہے ۔ سپریم کورٹ کے فیصلے کے بعد الیکشن کمیشن نے سندھ اور پنجاب کے بلدیاتی انتخابات کے شیڈول منسوخ کرنے کے نوٹیفکیشن جاری کردیے، نوٹیفکیشن میں کہا گیا ہے کہ9دسمبر کو جاری نوٹیفکیشن کے مطابق الیکشن شیڈول قابل عمل نہیں رہا، پرانی تاریخوں پر بلدیاتی انتخابات کا معاملہ موخر سمجھا جائے، ضروری انتظامات مکمل ہونے کے بعد نیا الیکشن شیڈول جاری کیا جائے گا۔

سیکریٹری الیکشن کمیشن اشتیاق احمد نے میڈیا سے گفتگوکرتے ہوئے کہا کہ عدالت کے فیصلے کے بعد پہلے صوبائی حکومتیں قانون میں ترمیم کریں گی، پھر قواعد بنیں گے اور حلقہ بندیاں ہوں گی، اس کے بعد نیا شیڈول جاری کیا جائے گا، قانون میں ترمیم سے پہلے الیکشن نہیں کرائے جاسکتے۔ کوشش یہ ہوگی کہ نیا شیڈول جلد جاری ہوجائے اور تاخیر نہ ہو۔ بیلٹ پیپرزکیلیے کاغذ خرید لیا گیا ہے جو5 سال تک خراب نہیں ہو سکتا، اس لیے اس مد میں رقم ضائع نہیں ہوگی تاہم امیدواروں کے کاغذات نامزدگی غیر موثر ہو چکے ہیں۔

نیا شیڈول آنے کے بعد انھیں ازسرنوکاغذات جمع کرانا ہوں گے۔ کاغذات نامزدگی فیس کی رسید سنبھال کر رکھیں، نیا شیڈول آنے کے بعد انھیں اسی رسیدکے ساتھ کاغذات نامزدگی جمع کرنے کی اجازت دی جائے گی۔ اے پی پی کے مطابق انھوں نے کہا کہ پنجاب اور سندھ کیلیے بلدیاتی انتخابات کا پرانا شیڈول منسوخ ہوگیا ہے، نئی تاریخوں سے متعلق سندھ اور پنجاب سے مشاورت کریں گے۔ بی بی سی کے مطابق ان کا کہنا تھا کہ عدالت نے حکم جاری کیا ہے کہ ہائیکورٹس کے احکامات کے مطابق سندھ اور پنجاب کی صوبائی حکومتوں نے قانون میں جو ترامیم کرنی اور ان سے متعلق جو پیشگی ضروریات پوری کرنی ہیں، پہلے انھیں مکمل کیا جائے۔