ریڈوانسکا ٹرافی تھامنے کا خواب حقیقت میں نہ بدل سکیں

ریڈوانسکا کو سبولکووا کیخلاف6 میں سے5 کامیابیوں کی وجہ سے فیورٹ قرار دیا جا رہا تھا۔ فوٹو: اے ایف پی/فائل

---

اگنیسکا ریڈوانسکا آسٹریلین اوپن کی ٹرافی تھامنے کا خواب حقیقت میںنہ بدل سکیں، سلواکیہ کی ڈومنیکا سبلکووا نے انھیں پچھاڑ کر فائنل میں رسائی حاصل کر لی، دوسرے سیمی فائنل میں چین کی لینا نے کینیڈین پلیئر ایوگینے بوچارڈ کو زیر کیا۔

مینز سنگلز میں سوئٹزرلینڈ کے اسٹینسلس واورینکا اپنے پہلے گرینڈ سلم فیصلہ کن معرکے تک پہنچ گئے،انھوں نے سخت جدوجہد کے بعد جمہوریہ چیک کے ٹوماس بریڈیچ کو قابو کیا،ان کا مقابلہ جمعے کو فیڈرر اور نڈال میں مقابلے کے فاتح سے ہوگا۔ تفصیلات کے مطابق سلواکیہ کی ڈومنیکا سبلکووا نے پولینڈ کی5ویں سیڈ اگنیسکا ریڈوانسکا کو6-1 اور 6-3 سے پچھاڑ کر فائنل کھیلنے کا اعزاز پالیا، اب ان کا سامنا چین کی چوتھی سیڈ لینا سے ہوگا جنھوں نے کینیڈین نوعمر کھلاڑی ایوگینے بوچارڈ کو 6-2 اور 6-4 سے زیر کیا۔ ریڈوانسکا کو سبولکووا کیخلاف6 میں سے5 کامیابیوں کی وجہ سے فیورٹ قرار دیا جا رہا تھا،اس جیت سے قبل سبلکووا نے19 برس کی عمر میں فرنچ اوپن گرینڈ سلم کے سیمی فائنل تک رسائی حاصل کی تھی،کیریئر میں 3 سنگلز ٹائٹلز جیتنے والی24 سالہ کھلاڑی نے میچ کے بعد کہاکہ مجھے اگنیسکا سے سخت مقابلے کی توقع تھی ، میچ کے دوران میرے ذہن میں مختلف خیالات آ رہے تھے لیکن میں نے صرف اپنے گیم پر توجہ مرکوز رکھی، مجھے یقین نہیں آرہاکہ فائنل تک پہنچ گئی ہوں۔



گذشتہ برس سبلکووا نے اسٹینفورڈ میں ریڈوانسکا کو فائنل میں شکست دی تھی۔دوسری جانب چین کی لینا مسلسل دوسری مرتبہ آسٹریلین اوپن کے فائنل میں پہنچی ہیں، فورتھ سیڈ نے19 سالہ اُبھرتی ہوئی کھلاڑی ایوگینے بوچارڈ کو میلبورن پارک میں 6-2 اور 6-4 سے زیر کیا۔31 سالہ لینا گذشتہ5 برسوں سے میلبورن کے کورٹس میں مضبوط پرفارمر ثابت ہورہی ہیں، یہاں وہ اب تک3 فائنلز،ایک سیمی فائنل اور چوتھے راؤنڈ میں شرکت کرچکی ہیں۔ بوچارڈ کو ہرانے کے بعد لینا کے پاس اپنا دوسرا گرینڈ سلم جیتنے کا سنہرا موقع ہے۔ شکست کے باوجود بوچارڈ کو نئی رینکنگ کی ٹاپ 20 پلیئرز میں شامل ہونے کی امید ہے۔ ادھر مینز سنگلز میں سوئٹزرلینڈ کے اسٹینسلس واورینکااپنے پہلے گرینڈ سلم فائنل میں پہنچ گئے،انھوں نے سخت جدوجہد کے بعد جمہوریہ چیک کے ٹوماس بریڈیچ کو6-3 ، 6-7 (1/7) ، 7-6 (7/3) اور 7-6 (7/4) سے قابو کیا، فائنل میں ان کا مقابلہ رافیل نڈال یا راجر فیڈرر سے ہوسکتا ہے۔

کوارٹر فائنلز میں تین مرتبہ کے دفاعی چیمپئن نوواک جوکووک کو ٹورنامنٹ سے باہر کرنے والے واورینکا نے فائنل میں پہنچ کر فیڈرر کی سوئس نمبر ون پوزیشن کو بھی ختم کردیا، فیڈرر 2001 سے اس درجے پر براجمان تھے۔جیت کے بعد واورینکا نے کہاکہ میرے پاس کہنے کیلیے الفاظ نہیں ہیں، مجھے میچ جیتنے اور یہاں پہلے فائنل تک پہنچنے پر خوشی ہے، میں ہر روز محنت کرکے میچز جیت رہا ہوں، اب نگاہیں فائنل پر مرکوز ہیں۔ دریں اثنا مینز ڈبلز سیمی فائنل میں امریکن ایرک بٹوراک اور جنوبی افریقہ کے راوین کلاسنے کینیڈین ڈینیئل نیسٹور اور سربیئن نیناد زیمونجک کو 6-2 اور 6-4 سے شکست دے دی،پولینڈ کے لوکاس کبوٹ اور سویڈش رابرٹ لندسٹیٹ نے فرنچ جوڑی مائیکل لوردا اور نکولس مہاٹ کو 6-4 ،12-14) 6-7 ( اور 6-3 سے ہرایا۔