بھارتی بورڈ نے زیادہ رقم کے مطالبے کو جائز قرار دیدیا

زیادہ آمدنی پیدا کرنے والے کو ادائیگی بھی زیادہ کرنی چاہیے ،سنجے پٹیل۔ فوٹو: فائل

---

بھارتی بورڈ نے زیادہ رقم کے مطالبے کو جائز قرار دیدیا ہے، سیکریٹری سنجے پٹیل کے مطابق زیادہ آمدنی پیدا کرنے والے کو ادائیگی بھی زیادہ کرنی چاہیے ۔

بی سی سی آئی نے کرکٹ آسٹریلیا اور ای سی بی کے ساتھ ایک 'پوزیشن پیپر' ڈرافٹ کیا جس میں آمدنی کی تقسیم میں بگ تھری بورڈز کو زیادہ حقدار قرار دیا گیا ہے۔ حیدرآباد دکن میں رنجی ٹرافی فائنل کے موقع پر میڈیا سے بات چیت کرتے ہوئے سنجے پٹیل نے کہا کہ اگرچہ ہم کُل آمدنی کا60سے70 فیصد پیدا کررہے ہیں لیکن صرف 4 فیصد ادائیگی کی جارہی ہے، اس لیے ہمارا مزید شیئرکا مطالبہ جائز ہے۔ مجوزہ نظام کے تحت بی سی سی آئی کو آئی سی سی کی آمدنی کا تقریباً تیسرا حصہ ملنے کی توقع ہے۔9 جنوری کوبورڈ میٹنگ میں تمام ارکان کو پوزیشن پیپر پیش کیا گیا تھا، بگ تھری کو امید تھی کہ تجاویز 28 اور 29 جنوری کے اجلاس میں منظور کرلی جائیگی۔



اگرچہ آئی سی سی نے اس بات کا اعلان کیا تھا کہ ڈرافٹ کے اہم اصولوں پر تمام ارکان متفق ہیں لیکن 28 جنوری کی میٹنگ کے اختتام تک ارکان کسی بھی نتیجے پر پہنچنے میں ناکام رہے تھے۔ اصل ڈرافٹ کے منظر عام پر آنے اور تنقید کا نشانہ بننے کے باوجود پٹیل نے پیپر اور سفارشات کو مثبت قرار دیا، انھوں نے کہا کہ اس کا پاور گیم سے کوئی تعلق نہیں ہے، ہم پوزیشن پیپر پر بالکل متفق ہیں، اس سے متعلق بہت سی غلط فہمیاں ہیں، بھارت کی پوزیشن کو مدنظر رکھتے ہوئے یہ بہت اچھا پوزیشن پیپر ہے،کرکٹ اور آمدنی کے لحاظ سے ہماری اہم پوزیشن ہے، تمام ارکان ہمارے مالی مطالبے پر متفق ہیں ۔