نیسلے پاکستان، خیبرپختونخوا حکومت اور ورلڈ بینک کی جانب سے سوات میں ذمہ دارانہ سیاحت کو فروغ دینے کیلیے تربیتی پروگرام

اسلام آباد: خیبر پختونخوا حکومت، عالمی بینک اور نیسلے پاکستان کے مشترکہ پروگرام ’’خیبر پختونخوا میں ماحولیاتی سیاحت کا لطف اٹھانے کیلیے ذمہ دارانہ سفر کیجیے‘‘ (TREK) کا مقصد ذمہ دارانہ سیاحت کو فروغ دینا ہے۔

نیسلے پاکستان نے خیبر پختونخوا حکومت کے محکمہ سیاحت کے اشتراک سے TREK کے تحت مقامی آبادی کی عملی شراکت کیلیے جاری سرگرمیوں کے طور پر سوات میں فضلے کی انتظام کاری (ویسٹ مینجمنٹ) اور پائیدار سیاحت پر دو روزہ تربیتی پروگرام منعقد کیا۔

واضح رہے کہ اس سے قبل دسمبر 2020 میں وزیراعظم پاکستان جناب عمران خان نے TREK کے لوگو کی نقاب کشائی کی تھی۔ یہ ’’خیبر پختونخوا انٹیگریٹڈ ٹورزم ڈیویلپمنٹ‘‘ (KITE) منصوبے کا حصہ ہے اور اسے وفاقی حکومت نے 2020 میں اپنی اہم کامیابیوں کی فہرست میں شامل بھی کیا ہے۔

تربیتی پروگرام کے شرکاء سے خطاب کرتے ہوئے تاشفین حیدر، ایڈیشنل سیکریٹری ٹورزم ڈیپارٹمنٹ، خیبر پختونخوا گورنمنٹ نے کہا ’’کائٹ (KITE) منصوبے کے تحت TREK پر عالمی بینک اور نیسلے پاکستان کے ساتھ اشتراک سے عملدرآمد کیا جارہا ہے۔‘‘

انہوں نے کہا ’’TREK کے تحت سالڈ ویسٹ مینجمنٹ (ٹھوس فضلے کی انتظام کاری) کے آلات، سیاحوں کیلیے آگاہی مہمات اور کچرا کم کرنے کیلیے مقامی آبادیوں کو تربیت کی فراہمی سمیت کئی سرگرمیاں KITE کے تحت مکمل کی جاچکی ہیں۔‘‘

اس پروگرام کے بارے میں اظہارخیال کرتے ہوئے وقار احمد، ہیڈ آف کارپوریٹ افیئرز اینڈ سسٹین ایبلیٹی، نیسلے پاکستان اینڈ افغانستان نے کہا ’’ہم پر جوش ہیں کہ TREK کے تحت کمیونٹی کی عملی شراکت داری سے متعلق سرگرمیاں بھرپور انداز میں شروع ہوچکی ہیں۔ ہاسپٹیلیٹی سیکٹر کیلیے ایسے تربیتی پروگراموں کے ذریعے فضلے سے پاک مستقبل (ویسٹ فری فیوچر) کے ہمارے وژن کو حقیقت کا روپ دینے میں مدد ملے گی۔‘‘

انہوں نے کہا ”نیسلے میں ہمارا یہ وژن ہے کہ ہماری پیکیجنگ بشمول پلاسٹک کو نہ زمین اور نہ ہی سمندروں میں ٹھکانے لگایا جائے۔ اس مقصد کے حصول کیلیے ہم نے2025 تک پلاسٹک پیکیجنگ کو 100 فیصد دوبارہ قابل استعمال بنانے (ری سائیکل کرنے) کا عزم کر رکھا ہے۔‘‘

کرن افضل، سینئر پرائیویٹ سیکٹر اسپشلسٹ،عالمی بینک گروپ کا کہنا تھا ’’ہمیں سوات میں اس پروگرام کو شروع کرنے پر انتہائی خوشی ہے جہاں سیاحوں کی تعداد میں اضافہ ہورہا ہے۔ ہمیں امید ہے کہ یہ شراکت داری سیاحتی مقامات کے حوالے سے ذمہ دارانہ رویّے اور ماحولیاتی نظام (ایکو سسٹم) کیلیے احترام کو تقویت پہنچاتے ہوئے ٹھوس، عملی اور حقیقی نتائج کے حصول میں سود مند ثابت ہوگی۔‘‘

نیسلے پاکستان کا TREK کیلیے عزم دو ستونوں پر قائم ہے: پہلا، بڑے پیمانے پر آگاہی مہم جو کچرے/ فضلے کا پھیلاؤ کم کرنے، اسے دوبارہ قابل استعمال بنانے اور ری سائیکلنگ پر توجہ مرکوز کرنے سے متعلق ہے؛ اور دوسرا، مقامی آبادی (کمیونٹی) کو مصروف عمل کرنے کا منصوبہ جس میں وہ سرگرمیاں شامل ہیں جو کچرے، آلودگی اور جنگلی حیات کے خاتمے کے مسائل سے نمٹنے میں مدد دیں گی۔

اس طرح TREK پروگرام اقوام متحدہ کے پائیدار ترقی کے اہداف 12، 13، 15، اور 17 کی عین مطابقت میں ہے۔

ویسٹ مینجمنٹ کے حوالے سے دو روزہ تربیتی پروگرام میں کچرے/ فضلے کی درجہ بندی، ری سائیکلنگ کی اہمیت، ویسٹ آڈٹ، بنیادی غذائی تحفظ اور WASH پر عمل درآمد کی اہمیت پر سیشن شامل تھے۔ تربیتی پروگرام کے اختتام پر غلام سعید، ڈائریکٹر جنرل ڈائریکٹوریٹ آف ٹورسٹ سروسز اور توصیف خالد، پراجیکٹ ڈائریکٹر KITE نے شرکاء میں انعامات تقسیم کیے۔