بنگلہ دیش کو وائٹ واش سے بچنے کا چیلنج درپیش

چٹاگانگ: پریکٹس سیشن میں سری لنکن کرکٹرز دنیش چندیمل ساتھی پلیئرز کے ہمراہ فٹبال کھیل رہے ہیں ۔فوٹو : اے ایف پی

---

GUJRANWALA: بنگلہ دیش اور سری لنکا کے درمیان دوسرا ٹیسٹ منگل سے چٹاگانگ میں شروع ہورہا ہے۔

بنگال ٹائیگرز پر آئی لینڈرز کے خوف سے کپکپی طاری ہوگئی، دو میچز کی سیریز میں وائٹ واش کی خفت سے بچنے کا چیلنج درپیش ہے، مارشل ایوب انجری کی وجہ سے باہر ہوگئے، روبیع الاسلام کو خود باہر کردیا گیا، دوسری جانب سری لنکا کو بھی انجریز کے باعث رنگانا ہیراتھ اور شامندا ایرنگا کی خدمات حاصل نہیں ہوں گی۔ تفصیلات کے مطابق بنگلہ دیش کو میرپور میں کھیلے جانے والے پہلے ٹیسٹ میں ایک اننگز اور 248 رنز سے شکست کا منہ دیکھنا پڑا تھا، اس مقابلے میں میزبان بیٹسمین خاص طور پر بائونسرز کے سامنے جدوجہد کرتے ہوئے دکھائی دیے تھے، ایک بار پھر وہ لمبی اننگز پر توجہ دینے کے بجائے وقتی طور پر تماشائیوں کو جارحانہ کھیل سے لطف اندوز کرنے کی کوششوں میں مصروف دکھائی دیے جس کا نتیجہ شکست کی صورت میں ہی نکلنا تھا اب بنگال ٹائیگرز کو وائٹ واش ناکامی کا سامنا درپیش ہے۔



اس کے لیے ایک اچھی خبر یہ ہوسکتی ہے کہ سری لنکا کے دو اہم کھلاڑی رنگانا ہیراتھ گھٹنے اور شامندا ایرنگا تھائی اسٹرین کے باعث ٹیسٹ سے باہر ہوچکے ہیں، خود بنگلہ دیش کے مارشل ایوب کی کلائی جواب دے گئی ہے، ان کی جگہ اب امرالقیس لیں گے، روبیع الاسلام کو ڈراپ کیا گیا ہے، ان کی جگہ روبیل حسین کھیلیں گے جن کی 19 ٹیسٹ میچز میں ایوریج 81.23 ہے، محموداللہ اور عبدالرزاق میں سے کوئی ایک پلیئنگ الیون میں جگہ پائے گا۔ سری لنکن ٹیم میں ایرنگا اور ہیراتھ کی جگہ نوان پرادیپ اور اجنتھا مینڈس کو ملنے کی توقع ہے باقی ٹیم وہی رہے گی۔ چٹاگانگ کی پچ روایتی سلو ور فلیٹ ہے، اس میں فاسٹ بولرز کے لیے بہت کم بائونس ہوگا مگر بیٹسمین بڑی اننگز کھیل سکتے ہیں۔ اس گرائونڈ پر بنگلہ دیشی بیٹسمین اب تک پانچ سنچریاں اسکور کرچکے جن میں سے دو یہاں پر اکتوبر میں کھیلے جانے والے آخری ٹیسٹ میں بنی تھیں، بنگلہ دیش کے خلاف کمار سنگاکارا کی ایوریج گذشتہ پانچ اننگز میں 50 سے زائد رہی ہے جبکہ گذشتہ چار ٹیسٹ میچز میں انجیلومیتھیوز 99.60 کی اوسط سے رنز اسکور کرچکے ہیں۔