انفرادی کی بجائے اجتماعی ترقی کو فروغ دینا ہوگا گورنر پنجاب

دعوت اسلامی یوکے کے وفد سے گفتگو، انوار الحق رامے کی قیادت میں وفد کی ملاقات۔ فوٹو: فائل

---

گورنر پنجاب چوہدری محمد سرور نے کہا ہے کہ ہمیں انفرادی ترقی سے اجتماعی کامیابی کو زیادہ ترجیح دینی چاہیے۔

پاکستان کی بقا اور اس کا روشن مستقبل مشترکہ جدوجہد کے ساتھ ساتھ تحمل ،برداشت ،محبت اور اخوت جیسے جذبوں سے وابستہ ہے۔ اس وقت ملک جس مشکل ترین صورت حال سے دوچار ہے اس سے ہم اسی صورت نبرد آزما ہو سکتے ہیں جب ہم اپنی صفوں میں اتحاد و اتفاق پیدا کریں۔ ان خیالات کا اظہار انھوں نے گورنر ہائوس لاہور میں دعوت اسلامی یو کے تنظیم کے وفد جس کی قیادت مرکزی مجلس شوریٰ کے رکن حاجی غفور رضا عطاری کر رہے تھے اور ساہیوال سے سابق رکن قومی اسمبلی انوارالحق رامے کی سربراہی میں 20رُکنی وفد سے علیحدہ علیحدہ ملاقات کے دوران کیا۔



گورنر پنجاب نے کہا کہ وطن عزیز کے دشمن ملک کی سلامتی اور اَمن کو سبوتاژ کرنے کی کوشش کررہے ہیں لیکن وہ یہ بات جمع خاطر رکھیں کہ پاکستانی قوم اپنے محبوب وطن کی خاطر اپنے تمام تر اختلافات کو بالائے طاق رکھتے ہوئے اس کی حفاظت کرنا بھی جانتے ہیں، موجودہ حکومت دہشت گردی کے ایشو کو مستقبل بنیادوں پر حل کرنے اور ملک کی عظمت رفتہ کو دوبارہ بحال کرانے کے لیے ہر ممکن اقدامات کو بروئے کار لانے کے لئے سرگرم عمل ہے۔