شاہد آفریدی کا پی ایس ایل کے ابتدائی میچز میں واپسی کا امکان روشن

 کراچی: بائیو سیکیور ببل توڑنے والے کوئٹہ گلیڈیٹر کے آل راؤنڈر شاہد خان آفریدی دوبارہ ہوٹل پہنچ گئے، وہ تین روز آئسولیشن میں گزار کر ٹیم میں شامل ہوجائیں گے۔

ایکسپریس نیوز کے مطابق شاہد آفریدی کو منگل کی شب نیشنل اسٹیڈیم میں پریکٹس کے دوران کمر میں شدید تکلیف محسوس ہوئی تھی جس کی شدت کے سبب وہ بدھ کو بائیو سیکیور ببل توڑ کر اسپتال پہنچے۔

شاہد آفریدی نے نجی اسپتال میں ڈاکٹر سے معائنہ کروایا، جس پر انہیں انجکشن لگوانے کی ہدایت کی گئی۔ ذرائع کے مطابق انجکشن لگنے سے شاہد آفریدی کی طبیعت بہتر ہوئی جس کے بعد وہ دوبارہ ہوٹل پہنچے۔

شاہد آفریدی کو لیگ میں شرکت کے لیے دوبارہ تین روزہ آئسولیشن مکمل کرنا ہوگی، جس کے بعد وہ اپنی ٹیم کو جوائن کرسکیں گے۔

مزید پڑھیں: کوئٹہ گلیڈی ایٹرز کو دھچکا؛ شاہد آفریدی پی ایس ایل کے ابتدائی میچز سے باہر

واضح رہے کہ بدھ کی صبح  شاہد آفریدی  کی سالی کا بھی انتقال ہوگیا تھا تاہم انہوں نے  مرحومہ کی آخری رسومات میں شرکت نہ کرنے فیصلہ کرتے ہوئے وسیع تر قومی مفاد میں  لیگ کا حصہ بنے رہنے کو ترجیح دی۔