عمران خان میری سیاسی ملاقاتوں سے نہیں بلکہ ملکی تباہی و مہنگائی سے گھبرا گئے ہیں شہباز شریف

ملک میں بے روزگاری، قرضوں، آٹا، چینی اور کرپشن اسکینڈل کی وجہ سے عمران خان کو نیند نہیں آتی، اپوزیشن لیڈر

---

ABBOTTABAD: پاکستان مسلم لیگ (ن) کے صدر شہباز شریف نے کہا ہے کہ وزیراعظم عمران خان کو میری سیاسی ملاقاتوں سے نہیں بلکہ ملکی تباہی اور مہنگائی سے گھبراہٹ اور پریشانی ہے۔

احتساب عدالت لاہور میں رمضان شوگر ملز کیس کی سماعت ہوئی تو سابق وزیراعلیٰ پنجاب شہباز شریف اور بیٹے حمزہ شہباز پیش ہوئے۔

عمران خان میری سیاسی ملاقاتوں سے نہیں ملکی تباہی سے خوفزدہ ہیں:شہبازشریف pic.twitter.com/g6DpiIckP8

— Maryam Gandapur (@gandapur_maryam) February 15, 2022

اس موقع پر شہباز شریف نے میڈیا سے گفتگو کرتے ہوئے کہا کہ عمران خان کو گھبراہٹ اور پریشانی میری سیاسی ملاقاتوں سے نہیں ہے بلکہ انہوں نے ملک میں جو تباہی کی ہے، مہنگائی اور بے روزگاری ہے اس سے ہے، حکمرانوں نے ریکارڈ قرضہ لئے ہیں اور عوام کی فلاح وبہبود کے لئے کچھ نہیں کیا، گندم، شوگر ،ایل این جی سمیت دیگر اسکینڈل میں اربوں کھربوں کی کرپشن کی گئی ہے، ملک کی دولت دونوں ہاتھوں سے لوٹی گئی ہے، ان معاملات کی وجہ سے انہیں نیند نہیں آتی۔

یہ بھی پڑھیں: گھبرائے ہوئے لوگوں کو 20 سال بعد چوہدری شجاعت کی صحت کا خیال آگیا، وزیراعظم

حمزہ شہباز نے کہا کہ جہانگیر ترین سمیت سب کے ساتھ رابطے ہیں، ہدف ایک ہی ہے کہ عمران نیازی کو گھر جانا ہے، ہم تمام اپوزیشن جماعتوں کے ساتھ ملکر اپنے کام پر لگے ہوئے ہیں ، اللہ تعالیٰ بہت جلد عمران نیازی سے عوام کی جان چھڑوائے گا۔