وزیر اعظم نے تربیلا ڈیم کے پانچویں توسیعی منصوبے کا اعلان کردیا

ورلڈبینک نے منصوبے کیلیے 74 کروڑ ڈالر کی امداد دی،1410 میگا واٹ بجلی پیدا ہوگی، چیئرمین واپڈا، تربیلہ ملازمین کیلیے ہارڈ الاؤنس دینے کا وعدہ۔ فوٹو: فائل

---

وزیراعظم نواز شریف نے تربیلہ ڈیم کے چوتھے توسیعی منصوبے کا افتتاح کر تے ہوئے تربیلہ ڈیم کے پانچویں توسیعی منصوبے کی بھی منظوری دینے کااعلان کیاہے اور واپڈا حکام پر زور دیا کہ وہ چوتھے توسیعی منصوبے کومقررہ وقت سے قبل جبکہ پانچویں توسیعی منصوبے پر جلد ازجلد کام شروع کردیاجائے تاکہ ملک میں بجلی کاجاری لوڈشیڈنگ میں کمی آکرانرجی بحران کاخاتمہ ممکن ہوسکے۔

وزیراعظم نے بدھ کی سہ پہرتربیلہ ڈیم کے چوتھی توسیعی منصوبے کا باقاعدہ افتتاح کیا۔اس موقع پر تربیلہ ڈیم میں واقع پاور ہائوس میں منعقدہ تقریب میں وفاقی وزیر پانی و بجلی خواجہ آصف کے علاوہ وفاقی وزیر اطلاعات سینیٹر پرویز رشید ، ڈپٹی اسپیکر قومی اسمبلی جاوید مر تضیٰ عباسی ، حمزہ شریف اوردیگربھی اس موقع پرموجودتھے۔ چیرمین واپڈا سید راغب عباس شاہ نے وزیراعظم کو تربیلہ ڈیم کے چوتھے توسیعی منصوبے کے بارے میں تفصیلی بریفنگ دیتے ہوئے کہا کہ تربیلہ ڈیم کے چوتھے تو سیعی منصوبے کیلیے ورلڈ بینک نے 74کروڑ ڈالر کی امداد فراہم کر دی ہے جبکہ اس منصوبے سے 1410میگا واٹ بجلی پیدا ہو گی اور یہ مئی 2014ء میں مکمل کیا جائیگا۔

وزیر اعظم نواز شریف نے کہا کہ پانچویں توسیعی منصوبے سے1320میگا واٹ بجلی مزید پیدا ہو گی،1985کے بعدتر بیلہ ڈیم کا چوتھا تو سیعی منصوبہ ملک کا سب سے بڑاانرجی منصوبہ ہے اوریہ منصوبہ ملک کیلیے سنگ میل ثابت ہو گا،ملک میں انرجی بحران پر قابو پانے کیلیے بھاشا سمیت دیگرڈیمز بنانے کی ضرورت ہے،بھاشا اور اس کے ساتھ دیگر ڈیمز کی تعمیر سے نہ صرف ملک میں انرجی بحران پر قابو پالیا جائے گابلکہ تر بیلہ ڈیم جھیل میں ریت نہ آنے سے اس ڈیم کی عمر میں 35 سال اضافہ ہو جائے گا۔وزیر اعظم نواز شریف نے موقع پر موجود ایم پی اے حاجی شیرا ز خان کے مطالبے پر تربیلہ ڈیم کے ملازمین کیلیے ہارڈ الائونس دینے کا وعدہ کر تے ہوئے کہاکہ ضلع صوابی کیلیے سوئی گیس اور بجلی کے مد میں خصوصی پیکیج دیا جائیگا۔