نالوں میں کچرا پھینکنے والوں کے خلاف کارروائی کا فیصلہ

چینی کمپنیاں، لوکل کنٹریکٹرز اور سالڈ ویسٹ کے افسران و عملہ مشینری تیار رکھیں، زبیر چنا ۔ فوٹو : فائل

---

کراچی: سندھ سالڈ ویسٹ مینجمنٹ بورڈ کے منیجنگ ڈائریکٹر زبیر احمد چنا کی زیر صدارت اجلاس میں متوقع بارش کے سلسلے میں ایمرجنسی نافذکرتے ہوئے عملے کومتحرک رہنے کی ہدایت اور نالوں میں کچراپھینکنے والوں کے خلاف 144 کے تحت قانونی کارروائی کافیصلہ کیا گیاہے۔

زبیر احمد چنا نے اجلاس سے خطاب کرتے ہوئے کہا ہے کہ چینی کمپنیاں، مقامی ٹھیکیدار اور سالڈ ویسٹ بورڈ کے افسران عملہ اور مشینری تیاررکھیں ،پانی کی نکاسی کا کام بروقت انجام دینے کے لیے ٹیمیں تشکیل دی جائیں، پانی کی نکاسی کے لیے سینیٹری ورکرزکے گروپ کی شکل میں صفائی کے بجائے 3 سینیٹری ورکرز کو ہر پوائنٹ پر تعینات کیا جائے تاکہ تمام پوائنٹس پر عملہ موجود رہے.

انہوں نے کہا کہ چوک پوائنٹس کو کھولنے کے لیے بھی ٹیمیں تعینات کی جائیں، متعلقہ ٹھیکیدار اورافسران تمام سڑکوں کے پوائنٹس پر سینیٹری ورکرزکی تعیناتی کی فہرست فوری طور پر پیش کریں، سالڈ ویسٹ بورڈ کے افسران تمام متعلقہ اداروں کے ساتھ رابطے میں رہیں گے۔

زبیر احمد چنانے مزید ہدایت کی کہ شہریوںکی کچرے اور بارش کے پانی کی نکاسی سے متعلق شکایات فوری طور پر متعلقہ افسران تک پہنچائی جائیں تاکہ ان کی شکایات کابروقت ازالہ یقینی بنایا جاسکے اس سلسلے میں کوئی غفلت برداشت نہیں کی جائے گی، شہریوں کو ریلیف فراہم کرنے کے لیے ٹیمیں متحرک رہیں گی، عوام سے اپیل ہے کہ شکایات درج کرانے کے لیے شکایتی مراکز ہیڈ آفس کے واٹس ایپ نمبر 03181030851 پر رابطہ کریں اس کے علاوہ شہری اپنی شکایات SSWMB کمپلینٹس کراچی اپلی کیشن ڈاؤن لوڈکرکے بھی درج کرا سکتے ہیں۔