کراچی فائرنگ کے واقعات میں متحدہ کے 3 کارکنوں سمیت 9 افراد قتل

لیاری میںگینگ وار شدت اختیار کرگئی، دستی بم حملے اور فائرنگ، پی آئی ڈی سی، شاہ لطیف ٹائون اور کریم آباد میں فائرنگ۔ فوٹو: فائل

---

شہر کے مختلف علاقوں میں فائرنگ کے واقعات میں متحدہ کے3کارکنوں سمیت 9افراد کو قتل کردیا گیا، لیاری میں گینگ وار شدت اختیار کرگئی، فریقین نے ایک دوسرے پر دستی بم حملے اور فائرنگ کی۔

رضویہ سوسائٹی میں دکان پر نامعلوم افراد کی فائرنگ سے متحدہ قومی موومنٹ کے یونٹ 189 کے کارکن 45 سالہ حامد اور 30 سالہ محمد علی عرف آصف شدید زخمی ہوگئے جنھیں فوری طور پر عباسی شہید اسپتال پہنچایا گیا تاہم دونوں ہی دوران علاج زخموں کی تاب نہ لاتے ہوئے چل بسے، وقوعے کے وقت حامد اپنی چپس کی دکان پر موجود تھا جبکہ محمد علی اس سے ملنے آیا تھا، دونوں افراد گلبہار ایک نمبر کے رہائشی ہیں، واقعے کی اطلاع ملتے ہی متحدہ قومی موومنٹ کے درجنوں کارکن اور عہدیدار عباسی شہیداسپتال پہنچ گئے اور قاتلوں کی گرفتاری کا مطالبہ کیا۔ لیاری کے علاقے کلاکوٹ کی گل محمد لین میں فائرنگ سے 25 سالہ رضوان عرف سنی ہلاک ہوگیا جس کی لاش سول اسپتال پہنچائی گئی ، سینئر ایم ایل او ڈاکٹر آفتاب چنڑ کے مطابق مقتول کو گردن پر گولی لگی جوکہ جان لیوا ثابت ہوئی ، پولیس کا کہنا ہے کہ مقتول عذیر بلوچ گروپ کا کارندہ تھا جسے مخالف گروپ نے قتل کیا، مقتول فوٹو لین جھٹ پٹ مارکیٹ کا رہائشی تھا۔

شارع فیصل کے علاقے گلستان جوہر بلاک 18 میں واقع قاسم کمپلیکس میں جمعرات اور جمعے کی درمیانی شب کار سوار ملزمان نے بابو جنرل اسٹور پر اندھا دھند فائرنگ کردی جس کے نتیجے میں دکان بیٹھے ہوئے 2 سگے بھائی 35 سالہ اعجاز حسین اور 24 سالہ ایاز حسین شدید زخمی ہوگئے جنھیں فوری طبی امداد کے لیے قریب ہی واقع نجی اسپتال لیجایا گیا جہاں ایاز حسین زخموں کی تاب نہ لاتے ہوئے دم توڑ گیا، پولیس کے مطابق مقتول ایاز اور اس کا بڑا بھائی اعجاز معمول کے مطابق رات گئے تک اپنی دکان پر بیٹھے تھے کہ نیلے رنگ کی کار میں سوار افراد نے ان پر فائرنگ کر دی ، مقتول گلستان جوہر بلاک 15 ایسٹرن پرائڈ کا رہائشی تھا اور آبائی تعلق خیر پور سے بتایا جاتا ہے، پولیس کا کہنا ہے کہ ابتدائی طور پر واقعہ بھتے کا تنازع معلوم ہوتا ہے تاہم پولیس نے زخمی اعجاز کی مدعیت میں نامعلوم ملزمان کے خلاف مقدمہ درج کرلیا۔

جیکسن کے علاقے کے پی ٹی گراؤنڈ مسان روڈ ریلوے لائن کے قریب سے 30 سالہ نامعلوم شخص کی لاش ملی جس کے جسم پر گولیاں لگی تھیں اطلاع ملنے پر پولیس نے لاش سول اسپتال پہنچائی جہاں اس کی شناخت رحیم اﷲ کے نام سے ہوئی، ایس ایچ او شبیر حیدر نے بتایا کہ مقتول سہراب گوٹھ کا رہائشی اور کباڑی کا کام کرتا تھا جبکہ لاش ملنے کی اطلاع پر سٹی ریلوے پولیس نے رابطہ کیا اور بتایا کہ جمعرات اور جمعے کی درمیان شب ریلوے یارڈ میں مشکوک افراد کی اطلاع پر ریلوے پولیس پہنچی جسے دیکھ کر ملزمان نے فائرنگ کر دی اور جوابی فائرنگکے بعد ملزمان فرار ہوگئے ایک شخص گولی لگنے سے زخمی ہوا تھا اور شبہ ہے کہ ملنے والی لاش اسی شخص کی ہے، ریلوے پولیس کے انکشاف کے بعد جیکسن پولیس مزید شواہد جمع کر رہی ہے تاکہ اس بات کا تعین کیا جا سکے کہ ہلاک ہونے والا جرائم پیشہ تھا یا کوئی اور ہے۔

بلدیہ ٹائون کے علاقے بسم اللہ کالونی سیکٹر 4-I میں نامعلوم افراد کی فائرنگ سے متحدہ قومی موومنٹ کی تنظیم پنجابی پختون آرگنائزنگ کمیٹی کا کارکن 35 سالہ عبدالرشید ہلاک ہوگیا ، ایس ایچ او سعید آباد کے مطابق مقتول رانگڑ محلے کا رہائشی تھا۔ لیاری کے علاقے جونا مسجد کے قریب بوری میں بند لاش ملی، سول اسپتال کے سینئر ایم ایل او ڈاکٹر آفتاب چنڑ کے مطابق مقتول کی شناخت 27 سالہ وقاص کے نام سے کی گئی، مقتول لیاری میں ہی قتل کیے جانے والے رضوان کا سگا بھائی تھا، واقعے کے بعد لیاری کے مختلف علاقوں میں گینگ وار میں تیزی آگئی اور مخالفین نے ایک دوسرے پر جدید اور آتشیں اسلحے سے فائرنگ کی۔ مرزا آدم خان روڈ ، کلاکوٹ ، کلری ، گارڈن ، دھوبی گھاٹ اور متصل علاقے گولیوں کی تڑتڑاہٹ سے گونج اٹھے، اس دوران دونوں جانب سے دستی بموں اور کریکروں کا بھی آزادانہ استعمال کیا گیا، رات بھر لیاری کا علاقہ دھماکوں سے گونجتا رہا، رات گئے تک علاقے میں صورتحال انتہائی کشیدہ تھی۔

رات گئے کلاکوٹ کے علاقے نواب مسجد کے قریب بکرا پیڑی سے 2 افراد کی لاشیں ملیں جنھیں نامعلوم ملزمان نے فائرنگ کرکے ہلاک کیا، ایک مقتول کی جیب سے شناختی کارڈ برآمد ہوا جس پر اس کا نام عبدالعزیز ولد گل حسن درج تھا جبکہ اس کا ایڈریس مکان نمبر 541 حاجی پیر محمد روڈ بغدادی گلی نمبر 5 لکھا ہوا ہے، علاقے سے موصول ہونے والی اطلاعات کے مطابق لاشیں پھینک کر فرار ہوتے ہوئے ملزمان نے فائرنگ بھی کی جس کی زد میں آکر 55 سالہ حاجی محمد رزاق نیازی زخمی ہوگیا جبکہ اسی دوران ایک پولیس اہلکار 30 سالہ عمران بیگ اپنی موٹر سائیکل پر اپنی رہائش گاہ واقع کلاکوٹ پولیس لائن جارہا تھا کہ ملزمان نے اس پر بھی فائرنگ کردی جس سے وہ زخمی ہوگیا۔ نامعلوم افراد کی فائرنگ سے شاہ لطیف ٹائون میں 50 سالہ ظہیر، پی آئی ڈی سی کے قریب 22 سالہ طاہراور کریم آباد کے قریب ایک شخص زخمی ہوگیا۔