انگلینڈ ٹیم کے کپتان ایون مورگن کا انٹرنیشنل کرکٹ سے ریٹائرمنٹ کا عندیہ

ویب ڈیسک  پير 27 جون 2022
فوٹو: فائل

فوٹو: فائل

مانچسٹر: انگلینڈ کرکٹ ٹیم کے ون ڈے اور ٹی ٹوئنٹی کپتان ایون مورگن نے انٹرنیشنل کرکٹ سے ریٹائرمنٹ کا عندیہ دے دیا۔

میڈیا پورٹ کے مطابق ایون مارگن نے ناصرف کپتانی بلکہ انٹرنیشنل کرکٹ سے ہی کنارہ کشی اختیار کرنے کا عندیہ دیا ہے، ممکنہ طور پر وہ کل پریس کانفرنس کے ذریعے ریٹائرمنٹ کا اعلان کریں گے۔

رپورٹ میں بتایا گیا کہ انگلش کپتان بار بار انجریز کا شکار ہونے اور میچز میں پرفارم نہ ہونے پر شدید ذہنی تناؤ کا شکار ہیں جس کے سبب انہوں نے کرکٹ سے دوری اختیار کرنے کا فیصلہ کرلیا ہے۔ ساتھی کھلاڑی معین علی نے مقامی میڈیا سے گفتگو کرتے ہوئے کہا کہ مورگن کے لیے انگلینڈ ٹیم سب سے پہلے ہے۔

معین کا کہنا تھا کہ کپتان نے ٹیم کے لیے یادگار خدمات انجام دیں۔ خیال ظاہر کیا جارہا ہے کہ ایون کی ریٹائرمنٹ پر ان کی جگہ جوز بٹلر کو کپتانی سونپی جاسکتی ہے۔

یاد رہے کہ ایون مورگن کی کپتانی میں انگلینڈ ٹیم 2019 کا ورلڈکپ اپنے نام کرچکی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔