ایک خوراک والی ریبیز ویکسین کے حوصلہ افزاء نتائج

ویب ڈیسک  جمعـء 29 جولائی 2022
(فوٹو: فائل)

(فوٹو: فائل)

آکسفورڈ: ایک تحقیق کے ابتدائی نتائج کے مطابق ایک خوراک والی ریبیز کی نئی ویکسین ریبیز بیماری کے خلاف تحفظ میں مؤثر پائی گئی ہے، پہلے مرحلے کے کلینیکل ٹرائلز کے نتائج کے مطابق یہ ویکسین محفوظ ہے۔

اس نئی ویکسین کا مقصد موجودہ ریبیز کی ویکسین کو درپیش مسائل کا حل ہے جن میں ان کا مہنگا اور ایک سے زیادہ خوراکوں کا ہونا شامل ہیں۔محققین کا کہنا ہے کہ نئی ریبیز ویکسین ہر سال ہزاروں لوگوں کو اس بیماری کے سبب واقع ہونے والی موت سے بچا سکے گی۔

آکسفورڈ یونیورسٹی کے ایسوسی ایٹ پروفیسر اور تجربے کے سربراہ محقق  سینڈی ڈگلس کا کہنا تھا کہ ہم حاصل ہونے والے ان ابتدائی نتائج سے بے حد خوش ہیں، اس ویکسین کی کارکردگی ہماری توقعات سے بہتر رہی ہے۔

انہوں نے کہا کہ موجودہ ویکسینز کے ساتھ مسئلہ یہ ہے کہ وہ مہنگی ہیں اور ان کی متعدد خوراکوں کی ضرورت ہوتی ہے، ہم بہت پُرامید ہیں کہ نئی ویکسین معمول کی کم قیمت اور ایک خوراک والی ویکسی نیشن کو ممکن بنائے گی۔

واضح رہے کہ ویکسین کے یہ تجربات آکسفورڈ یونیورسٹی میں کیے گئے اور ایسا پہلی بار ہوا کہ نئی ریبیز ویکسین کے تجربات انسانوں پر کیے گئے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔