ہالینڈ کے بولرز کو اچھی بولنگ پر داد دینی پڑے گی، فخر زمان

ویب ڈیسک  منگل 16 اگست 2022
فوٹو پی سی بی

فوٹو پی سی بی

 کراچی / روٹرڈیم: قومی کرکٹ ٹیم کے کپتان اور نیدر لینڈ کے خلاف پہلے میچ میں پاکستان کو فتح دلوانے میں اہم کردار ادا کرنے والے فخر زمان نے کہا ہے کہ ہالینڈ کے بولرز نے بہت اچھی بولنگ کی جس پر وہ داد کے مستحق ہیں۔

میچ کے بعد میڈیا سے گفتگو کرتے ہوئے فخر زمان نے کہا کہ شروع میں پچ بہت مشکل تھی مگر ہمیں بہتر کرکٹ کھیلنی چاہیے تھی، آغاز میں اس پچ پر گیند سیم ہورہا تھا اور رک کر بھی آرہا تھا، جس کی وجہ سے ابتدا میں بلے بازوں کو مشکل ہوئی۔

انہوں نے کہا کہ امام کے آوٹ ہونے کے بعد بابر اعظم سے پلاننگ کی کہ بس وکٹ نہیں دینی اور کریز پر موجود رہنا ہے، جس کا ہمیں بہت زیادہ فائدہ بھی ہوا۔

مزید پڑھیں: پاکستان نے نیدرلینڈز کو 16 رنز سے شکست دے دی

فخر زمان کا کہنا تھا کہ کسی وقت بھی یہ محسوس نہیں ہوا کہ میچ ہاتھ سے نکل گیا ہے البتہ یہ کہنا بھی ضروری ہے کہ ہالینڈ کے باولرز کو داد دینی چاہیے کہ انہوں نے اچھی باؤلنگ کی۔ اُن کا کہنا تھا کہ کرکٹ میں آخری گیند تک مقابلہ ہوتا ہے، انٹرنیشنل کرکٹ میں کوئی بھی ٹیم کمزور نہیں ہوتی، ہالینڈ نے بہترین کرکٹ کھیلی۔ 

نسیم شاہ کے بارے میں فخر زمان کا کہنا تھا کہ نسیم شاہ نے عمدہ باولنگ کی وہ پاکستان کا مستقبل ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔