خاتون کو قابل اعتراض تصاویر سے ہراساں کرنے والا ملزم گرفتار

وفاقی تحقیقاتی ادارے (ایف آئی اے) نے خاتون کو قابل اعتراض تصاویر اور ویڈیوز کے ذریعے ہراساں کرنے والے ملزم کو گرفتار کرلیا۔

ایف آئی اے سائبرکرائم سرکل فیصل آباد نے خاتون کو ہراساں کرنے میں ملوث ملزم گرفتار کیا جس کی شناخت تنویر عالم کے نام سے ہوئی۔

وفاقی تحقیقاتی ایجنسی کی جانب سے جاری اعلامیے کے مطابق شکایت کنندہ کی قابل اعتراض تصاویر اور ویڈیوز شیئر کرنے میں ملوث ملزم کو جڑانوالہ میں چھاپہ مار کارروائی کے نتیجے میں گرفتار کیا گیا۔

ترجمان کے مطابق ملزم شکایت کنندہ کو بلیک میل بھی کررہا تھا، ملزم غیر اخلاقی تصاویر اپلوڈ نہ کرنے کے عوض رقم بھی ہتھیا چکا تھا اور شکایت کنندہ کو جان سے مارنے کی دھمکیاں بھی دے رہا تھا۔

ایف آئی اے نے ملزم کے زیر استعمال موبائل کو قبضے میں لے کر فرانزک کے لئے بھیجوا دیا جبکہ پیکا ایکٹ کے تحت مقدمہ درج کر کے تفتیش شروع کردی۔