ڈیفنس کی مختلف دکانوں سے 12 لاکھ کی اسمگل سگریٹ ضبط

احتشام مفتی  ہفتہ 21 جنوری 2023
کسٹم کی کارروائی میں ڈیفنس کی دکان سے برآمد کی جانے والی اسمگل سگریٹ ۔ فوٹو : ایکسپریس

کسٹم کی کارروائی میں ڈیفنس کی دکان سے برآمد کی جانے والی اسمگل سگریٹ ۔ فوٹو : ایکسپریس

  کراچی: ڈائریکٹوریٹ انٹیلی جنس اینڈ انویسٹی گیشن ایف بی آر کراچی نے موصولہ خفیہ اطلاع پر نان ڈیوٹی ٹیکس پیڈ سگریٹس کے خلاف ڈیفنس کی مختلف دکانوں پر چھاپے مارکر 12 لاکھ روپے مالیت کے نان ڈیوٹی و ٹیکس پیڈ سگریٹس برآمد کرلیے گئے ہیں۔

ذرائع نے ایکسپریس کو بتایا کہ چھاپے کے دوران 16لاکھ سگریٹ اسٹکس برآمد کیے گئے ہیں جن پر کسٹم ڈیوٹی, فیڈرل ایکسائز ڈیوٹی اور سیلز ٹیکس کی مد میں 16لاکھ روپے کا ریونیو چوری کیا گیا ہے، برآمد شدہ سگریٹس میں پائن، بینسن ، مال برو, کیمل سمیت دیگر برانڈز شامل ہیں۔

آئی اینڈ آئی حکام نے مقدمہ درج کرکے سگریٹ کا ذخیرہ ضبط کرلیا ہے، ذرائع نے بتایا کہ جعلی واسمگل شدہ سگریٹس کی اس غیرقانونی کاروبار سے قومی خزانہ کو ایف ای ڈی کی مد میں سالانہ اربوں روپے مالیت کا نقصان پہنچایا جارہا ہے۔ منظم گروہ جعلی سگریٹس سپلائی کرکے اربوں روپے کی ڈیوٹی، ایف ای ڈی کی چوری میں ملوث ہے۔

ڈائریکٹوریٹ جنرل آئی اینڈ آئی ایف بی آر کی سخت ہدایات کی روشنی کراچی ڈائریکٹوریٹ نے اپنے خفیہ نیٹ ورک کے تعاون سے نئی حکمت عملی اختیار کرتے ہوئے جعلی اور نان ڈیوٹی پیڈ سگریٹس کے خلاف آپریشن کی رفتار تیز کردی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔