کینٹ اسٹیشن قیمتی موبائل فونز سے بھرے کارٹن چرا کر فرار ہونیوالا ملزم گرفتار

کینٹ ریلوے اسٹیشن پر کارگو سے موبائل فونز کا ڈبہ چرانے والا ملزم پولیس کی تحویل میں ہے ۔ فوٹو : ایکسپریس

---

ریلوے پولیس نے کینٹ اسٹیشن پر واقع کار گو سے قیمتی موبائل فونز سے بھرے کارٹن چرا کر فرار ہونے والے ملزم کو رنگے ہاتھوں گرفتار کرلیا ۔

برآمد کیے جانے والے80 موبائل فون کی مالیت 2 لاکھ روپے سے زائد ہے ، گرفتار ملزم اس قبل ہی اسی طرح ایک اور واردات کے مقدمے میں مفرور تھا، پولیس نے مقدمہ درج کر کے تفتیش شروع کردی، تفصیلات کے مطابق ریلوے پولیس نے کینٹ اسٹیشن کے احاطے میں واقعے کار گو سے قیمتی موبائل فون سے بھرے کارٹن چوری کرکے فرار ہونے والے ملزم25 سالہ اکرام کو گرفتار کر کے اس کے قبضے سے 80 قیمتی موبائل فون برآمد کر لیے ۔

ایس ایس پی ریلوے روبن یامین نے ایکسپریس کو بتایا کہ گرفتار ملزم کے قبضے سے برآمد کیے جانے والے موبائل فون کراچی سے فیصل آباد کے لیے بک کرائے گئے تھے اور برآمد کیے جانے والے موبائل فون کی مالیت2 لاکھ روپے سے بھی زائد ہے انھوں نے بتایا کہ گرفتار کیے جانے والا ملزم پشاور کا رہائشی ہے تاہم کراچی میں اس کی رہائش کے حوالے سے معلومات اکٹھا کی جا رہی ہیں۔

انھوں نے بتایا کہ گرفتار ملزم کے سابقہ کرمنل ریکارڈ سے معلوم ہوا ہے کہ گرفتار ملزم اس سے قبل ہی اسی طرح کی ایک اور واردات کے مقدمے میں بھی مفرور تھا انھوں نے بتایا کہ پولیس نے گرفتار ملزم کے خلاف مقدمہ درج کر کے تفتیش شروع کرد ی ہے ، گرفتار ملزم سے گزشتہ دنوں چوری ہونے والے پرائز بانڈز کے حوالے سے بھی تفتیش کی جا ئے گی، گرفتار ملزم اکرام کا کہنا ہے وہ بے روز گار تھا اسی لیے اس نے چوری کی واردات کی ۔