چھوٹی ناؤ میں بیٹھ کر دریائے مسیسیپی عبور کرنے والا معمر ترین شخص
ڈیل سینڈرز نے پہلی بار 2015 میں 80 سال کی عمر میں دریائے مسیسیپی کو عبور کیا
ایک امریکی شہری نے چھوٹی ناؤ میں چپو کی مدد سے دریائے مسیسیپی عبور کرنے والا دنیا کے معمر ترین شخص کا عالمی اعزاز حاصل کرلیا ہے۔
امریکی میڈیا کے مطابق ریاست ٹینیسی سے تعلق رکھنے والے 87 سالہ امریکی شہری ڈیل سینڈرز نے دریائے مسیسیپی کا سفر 87 دن میں مکمل کیا اور ایسا کرنے والے معمر ترین شخص کا گنیز ورلڈ ریکارڈ اعزاز حاصل کیا۔
ڈیل سینڈرز اپنی 87 ویں سالگرہ پر ریاست مینیسوٹا کی جھیل اٹاسکا سے شروع ہوئے اور 87 دن بعد لوئزیانا کے علاقے لولنگ پہنچے۔ انہوں نے 87 سال اور 87 دن کی عمر میں گنیز ورلڈ ریکارڈ اپنے نام کیا۔
ڈیل سینڈرز نے 15 فٹ، 6 انچ چھوٹی ناؤ میں بیٹھ کر یہ کارنامہ انجام دیا۔ انہوں نے پہلی بار 2015 میں 80 سال کی عمر میں دریائے مسیسیپی کو عبور کیا۔
انہوں نے گنیز ورلڈ ریکارڈز کو دیے گئے انٹرویو میں بتایا کہ میرا مقصد اپنے ذاتی ریکارڈ کے ساتھ ساتھ گنیز ورلڈ ریکارڈ کا نیا آفیشل ٹائٹل بھی حاصل کرنا تھا اور اس کا یہ موقع ضائع نہیں کرنا چاہتا تھا۔
