رنبیر کپور اور عالیہ بھٹ نے اپنی بیٹی کو کروڑوں کی مالکن بنا دیا

رنبیر کپور اور عالیہ بھٹ نے شاہ رخ خان اور امیتابھ بچن کو بھی پیچھے چھوڑ دیا : فوٹو : فائل

---

بالی ووڈ کی مقبول ترین جوڑی رنبیر کپور اور عالیہ بھٹ نے 250 کروڑ سے زائد مالیت کا اپنا نیا بنگلہ بیٹی کے نام کر دیا۔

بھارتی میڈیا کے مطابق رنبیر کپور اور عالیہ بھٹ کا نیا بنگلہ ممبئی کے پوش علاقے باندرہ میں زیرِ تعمیر ہے جس کی قمیت تقریباََ بھارتی 250 کروڑ روپے سے زائد ہے۔

رپورٹ میں بتایا گیا کہ رنبیر کپور اور عالیہ بھٹ کی بیٹی کے نام کیا گیا یہ بنگلہ ممبئی کا سب سے مہنگا ترین 'سیلیبریٹی بنگلہ' ہے جس نے بالی ووڈ کنگ شاہ رخ خان کے 'منت' اور امیتابھ بچن کے بنگلے 'جلسہ' کو بھی پیچھے چھوڑ دیا ہے۔

ذرائع کا کہنا ہے کہ رنبیر کپور کی والدہ نیتو کپور بھی اپنی پوتی کے بنگلے کی شریک مالک ہوں گی جبکہ حال ہی میں عالیہ بھٹ، نیتو اور رنبیر کپور کو اپنی بیٹی راحہ کے زیرِِ تعمیر بنگلے میں دیکھا گیا تھا۔

مزید پڑھیں: عاطف اسلم کی بیٹی حلیمہ اور عالیہ، رنبیر کی راحہ ہمشکل قرار

بھارتی میڈیا کا کہنا ہے کہ عالیہ بھٹ اور رنبیر کپور کی بیٹی راحہ کپور 250 کروڑ روپے سے زائد مالیت کے بنگلے کی مالکن بننے کے بعد بالی ووڈ کی سب سے کم عُمر امیر ترین 'اسٹار کِڈ' بن گئی ہیں۔

رپورٹ میں یہ بھی بتایا گیا کہ عالیہ بھٹ اور رنبیر کپور باندرہ کے علاقے میں چار فلیٹس کے مالک بھی ہیں جن کی مالیت بھارتی 60 کروڑ روپے سے زائد ہے جبکہ نیتو کپور نے بھی حال ہی میں باندرہ کے علاقے میں 15 کروڑ روپے کا ایک شاندار گھر خریدا ہے۔

بھارتی میڈیا کا مزید کہنا تھا کہ راحہ کپور کے نام کیا گیا بنگلہ تیار ہونے کے بعد نیتو کپور، عالیہ بھٹ اور رنبیر کپور اسی بنگلے میں ایک ساتھ رہیں گے۔