رکن قومی اسمبلی صبحین غوری نے پاک فوج کو خراجِ تحسین پیش کرتے ہوئے کہا کہ پوری قوم اپنی بہادر فوج کے ساتھ شانہ بشانہ کھڑی ہے۔
پارلیمانی سیکریٹری برائے آئی ٹی، صبحین غوری نے ان خیالات کا اظہار حالیہ بھارتی جارحیت کے جواب میں قومی اسمبلی کے اجلاس میں کیا۔
انھوں نے اپنی جذباتی اور دھواں دھار تقریر میں پاکستان کی مسلح افواج کے مؤثر اور فیصلہ کن ردِعمل کو سراہتے ہوئے کہا ہے کہ پوری قوم ملک عزیز کے دفاع کے لیے ہر قیمت چکانے کو تیار ہے۔
رکن اسمبلی صبحین غوری نے کہا کہ جارحیت پسند بھارت نے کھلی اشتعال انگیزی کرتے ہوئے جان بوجھ کر شہریوں اور عبادت گاہوں کو نشانہ بنایا۔
انھوں نے مزید کہا کہ پاکستان کی مسلح افواج نے بھرپور جوابی کارروائی کی، بھارت کی فوجی تنصیبات اور لاجسٹک مراکز کو کامیابی سے نشانہ بنایا۔ جدید S-400 دفاعی نظام کو مفلوج کردیا۔
اپنے خطاب میں صبحین غوری نے برمحل شعر بھی پڑھا جسے دیگر ارکان اسمبلی نے ڈیسک بجا کر داد کی۔