کراچی:
شہر کے مختلف علاقوں میں صبح کے وقت بوندا باندی اور ہلکی بارش سے موسم خوش گوار ہوگیا۔
تفصیلات کے مطابق شارع فیصل، پی ای سی سی ایچ سوسائٹی، محمد علی سوسائٹی، سندھی مسلم سوسائٹی، ایڈمنسٹریشن سوسائٹی، محمودآباد، منظور کالونی، صدر، مزار قائد، لیاری، کلفٹن اور اطراف میں پھوار، بوندا باندی اور ہلکی بارش ہوئی۔
مون سون کی کمزور ہوائیں صوبے کے جنوبی علاقوں میں مسلسل داخل ہو رہی ہیں، کراچی آج زیادہ تر مطلع ابر آلود اور مرطوب موسم کے ساتھ ہلکی بارش کا امکان ہے۔ آج کم سے کم درجہ حرارت 28 ڈگری سینٹی گریڈ ریکارڈ کیا گیا۔
کراچی میں جنوب مغربی سمت سے 11 کلو میٹر فی گھنٹہ کی رفتار سے چل رہی ہیں جبکہ ہوا میں نمی کا تناسب 70سے 85 فیصد کے درمیان ریکارڈ کیا جا رہا۔
کل اور پرسوں صبح و رات کے اوقات میں پھوار اور بونداباندی ہونے کی توقع ہے۔ آئندہ 3 روز کے دوران کراچی کا زیادہ سے زیادہ درجہ حرارت 33 تا 35 ڈگری کے درمیان ریکارڈ ہو سکتا ہے۔
آج تھرپارکر، بدین، ٹھٹھہ، سجاول، میرپورخاص، عمرکوٹ، جامشورو، حیدرآباد، ٹنڈو محمد خان کے اضلاع اور کراچی ڈویژن میں ہلکی بارش اور بوندا باندی کا امکان ہے۔ کل قمبر شہدادکوٹ، لاڑکانہ اور دادو کے اضلاع میں چند مقامات پر بارش کا امکان ہے۔
صوبے کے باقی حصوں میں مطلع جزوی طور پر ابر آلود، گرم اور مرطوب رہنے کا امکان ہے۔
