اسلام آباد:
وفاقی وزارت مذہبی امور نے ایران، عراق اور شام جانے والے زائرین کے حوالے سے سالار نظام کو ختم کرکے اس کی جگہ زیارات گروپ آرگنائزرز سسٹم متحرک کرنے کا فیصلہ کیا ہے۔
سرکاری خبرایجنسی کی رپورٹ کے مطابق وزارت مذہبی امور نے بتایا کہ وفاقی حکومت نے زائرین کے حوالے سے 2021 میں یہ پالیسی متعارف کرائی تھی جس پر اب تیزی سے عمل درآمد کا فیصلہ کیا گیا ہے۔
وزارت مذہبی امور نے کہا کہ حج اور عمرہ کی طرح اب زیارات مقدسہ کے لیے بھی وزارت مذہبی امور میں رجسٹریشن کرانا لازمی ہوگی، 2021 میں بھی زیارات گروپ آرگنائزرز سے درخواستیں طلب کی گئی تھیں اور اب تک 585 کمپنیز نے اپنی دستاویزات اور کوائف مکمل کیے ہیں۔
ترجمان مذہبی امور نے کہا کہ زیارات گروپس کی رجسٹریشن کے لیے وزارت مذہبی امور نے ایک اور موقع فراہم کیا ہے، گروپ یا کمپنی کی رجسٹریشن کے لیے کردار، مالی شفافیت کے ساتھ میزبان ملک میں بلیک لسٹ نہ ہونا لازم ہوگا۔
انہوں نے بتایا کہ زیارات گروپ آپریٹر کے طور پر کام کا تجربہ، دستاویزی ثبوت، آڈٹ یا مالیاتی بینک کی رپورٹ بھی لازمی ہوگی، نئی کمپنی 10 اگست 2025 سے قبل درخواستیں جمع کرانے کی پابند ہوں گی۔
ترجمان کا کہنا تھا کہ نجف و کربلا، مشہد و قم، کاظمین و دمشق کے زائرین کی مشکلات کے پیش نظر یہ اقدام کیا گیا ہے۔
