اسلام آباد:
نائب وزیراعظم و وزیر خارجہ سینیٹر محمد اسحاق ڈار آئندہ ہفتے امریکا کے دورے پر روانہ ہوں گے جہاں وہ نیویارک میں اقوام متحدہ کی سلامتی کونسل کی صدارت سے متعلق اعلیٰ سطح دستخطی تقریبات میں شرکت کریں گے۔
ترجمان دفتر خارجہ کے مطابق اس دورے کے دوران پاکستان کی کثیرالجہتی سفارت کاری کو بھرپور انداز میں اجاگر کیا جائے گا، اسحاق ڈار اقوام متحدہ میں ایک اعلیٰ سطح مباحثے کی صدارت کریں گے جس کا موضوع "کثیر جہتی کے ذریعے بین الاقوامی امن و سلامتی کو فروغ دینا اور تنازعات کا پُرامن حل ہے۔ مباحثے کا مقصد سفارت کاری، ثالثی اور کثیرالجہتی نظام کو مضبوط بنانے کے طریقوں پر تبادلہ خیال کرنا ہے۔
علاوہ ازیں وہ سلامتی کونسل کے سہ ماہی مباحثے کی صدارت بھی کریں گے، جس میں "فلسطین سمیت مشرق وسطیٰ کی صورتِ حال" پر گفتگو ہوگی۔
اسحاق ڈار اقوام متحدہ کی ایک اعلیٰ سطح بریفنگ کی بھی صدارت کریں گے، جس میں اسلامی تعاون تنظیم (OIC) اور اقوام متحدہ کے درمیان تعاون کو مضبوط بنانے پر توجہ دی جائے گی۔ یہ اجلاس پاکستان کی اس کوشش کا حصہ ہے جس کے تحت بین الاقوامی امن و سلامتی کے قیام میں اسلامی دنیا کا مؤثر کردار اجاگر کیا جا رہا ہے۔
سینیٹر اسحاق ڈار "فلسطینی عوام کے حقِ خودارادیت" اور "دو ریاستی حل" کی حمایت میں ایک اعلیٰ سطح بین الاقوامی کانفرنس میں بھی شرکت کریں گے، کانفرنس میں مسئلہ فلسطین کے پُرامن حل کے لیے پاکستان کی غیر متزلزل حمایت کا اعادہ کیا جائے گا۔
نیویارک میں قیام کے دوران وزیر خارجہ کی اقوام متحدہ کے اعلیٰ حکام اور دیگر ممالک کے وزرائے خارجہ سے اہم دوطرفہ ملاقاتیں بھی متوقع ہیں۔
دفتر خارجہ نے واضح کیا ہے کہ یہ دورہ پاکستان کی اقوام متحدہ کے پلیٹ فارم پر فعال سفارت کاری اور امن و انصاف کے فروغ کے عزم کی عکاسی کرتا ہے۔
