کوئٹہ:
بلوچستان کے علاقے سوئی میں کالعدم تنظیم کے کمانڈر سمیت ایک سو سے زائد افراد نے ہتھیار ڈال دیے۔
کمانڈر وڈیرہ نور علی چاکرانی اور ان کے ساتھیوں نے اسلحہ میر آفتاب احمد بگٹی کے حوالے کیا، مسلح افراد نے ہتھیار پھینک کر پاکستان کا جھنڈا تھام لیا اور ریاست پاکستان سے وفاداری کا حلف اٹھایا۔
دہشت گردوں کے سرینڈر کرنےکے موقع پر ضلع ڈیرہ بگٹی کے معززین اور میڈیا کے نمائندے بھی موجود تھے۔
بی آر اے کے شرپسندوں نے نور علی چاکرانی اور ان کے ساتھیوں پر اس وقت حملہ بھی کیا جب وہ ہتھیار ڈالنے کیلئے پاکستان ہاؤس جا رہے تھے۔
سرینڈر کرنے والے دہشت گردوں نے پاکستان ہاؤس کے کئیر ٹیکر میر آفتاب بگٹی اور ڈپٹی کمشنر(ڈیرہ بگٹی) کی موجودگی میں بڑی تعداد میں اسلحہ اور گولہ بارود سرینڈر کیا۔
وڈیرہ نور علی چاکرانی نے نہ صرف ہتھیار ڈالے بلکہ فتنہ الہندوستان (بی آر اے) کیخلاف چاکرانی امن فورس قائم کرنے کا اعلان بھی کیا۔
وڈیرہ نور علی چاکرانی کا سرینڈر کرناضلع ڈیرہ بگٹی کے موجودہ منظر نامے میں ایک اہم پیشرفت ہے اور بلوچستان میں سرگرم دیگر دہشت گرد تنظیموں کیلئے ایک بڑا دھچکا ہے۔
انسداد دہشت گردی کے حوالے سے سیکیورٹی فورسز کی مؤثرکاروائیوں اور حکمت عملی کے باعث اب دہشت گردوں کا ریاست کے سامنے ہتھیار ڈالنا ناگزیر ہوچکا ہے۔
وزیر اعلیٰ بلوچستان میر سرفراز بگٹی نے ہتھیار ڈالنے والے کمانڈر اور تمام افراد کو قومی دھارے میں شامل ہونے پر مبارکباد دیتے ہوئے کہا کہ سوئی ڈیرہ بگٹی میں وڈیرہ نور علی چاکرانی اور سو سے زائد ساتھیوں کا قومی دھارے میں شمولیت کا فیصلہ قابلِ تحسین ہے، یہ واضح پیغام ہے کہ ریاست نے بات چیت کے دروازے بند نہیں کیے، ہتھیار ڈالنے والوں نے پاکستان کا پرچم اٹھا کر امن کے سفر کا آغاز کیا ہے۔
انہوں نے کہا کہ جو ریاست کی نرمی کو کمزوری سمجھے گا، اس کا آخری دم تک تعاقب کیا جائے گا، ہتھیار پھینک کر آئینِ پاکستان تسلیم کرنے والوں کو گلے لگانے کا عمل بھی جاری ہے، بلوچستان میں ریاست مخالف عناصر کے خلاف انٹیلیجنس بیسڈ آپریشنز جاری ہیں۔
