خیبر:
خیبرپختونخوا کے محکمہ انسداد دہشت گردی (سی ٹی ٹی) نے پشاور اور ضلع خیبر کے علاقے جمرود میں دو الگ، الگ کارروائیوں کے دوران 6 دہشت گردوں کو ہلاک کردیا۔
سی ٹی ڈی کی جانب سے جاری بیان کے مطابق پہلی کارروائی پشاور کے نواحی علاقے ٹپوسانو باچا قبرستان ظاہر گھڑی میں مصدقہ خفیہ اطلاع پر کی گئی۔
بیان میں کہا گیا کہ سی ٹی ڈی ایمبوش پارٹی کی کارروائی میں 3 دہشت گرد ہلاک ہوئے جبکہ ان کے چند ساتھی آبادی کا فائدہ اٹھاتے ہوئے فرار ہوگئے تاہم ان کی تلاش کے لیے سرچ اینڈ اسٹرائیک آپریشن جاری ہے۔
سی ٹی دی کے مطابق خفیہ اطلاع پر دوسری کارروائی ضلع خیبر کے علاقے جمرود کی گئی جہاں شاہ کس بائے پاس روڈ پر واقع ناکے کلے میں فتنہ الخوارج کی تشکیل کو نشانہ بنایا جس میں 3 دہشت گرد ہلاک ہوئے۔
بیان میں کہا گیا کہ دہشت گردوں کے دو ساتھی پہاڑی علاقے میں فرار ہوگئے جن کی تلاش جاری ہے۔
سی ٹی ڈی کے مطابق ہلاک دہشت گرد فتنہ الخوارج کے سرگرم ارکان تھے، جو فورسز پر حملوں سمیت قتل، اقدام قتل، بھتہ خوری اور دیگر دہشت گردی کے واقعات میں ملوث رہے ہیں۔
بیان میں بتایا گیا کہ ہلاک دہشت گردوں کے قبضے 3 کلاشنکوفیں اور بارود برآمد ہوا ہے۔
سی ٹی ڈی نے بیان میں بتایا کہ آئی جی خیبر پختونخوا پولیس اور ایڈیشنل آئی سی ٹی ڈی نے کامیاب آپریشن پر محکمہ انسداد دہشت گری کی اسپیشل ویپنز اینڈ ٹیکٹکس ٹیمز کے جوانوں کو شاباش دی ہے۔
انہوں نے کہا ہے کہ دہشت گردی کے خاتمے اور امن و امان کے قیام کے لیے سر ہتھیلی پر رکھ کر لڑنے والے جوان عزم و ہمت کے پیکر اور ملک عزیز کا فخر ہیں۔
