براڈ کاسٹنگ شیڈول نے ٹی 20 ورلڈ کپ میں کرکٹ کو ہی مذاق بنا کررکھ دیا

انٹرنیشنل کرکٹ کونسل کو اس موسم میں ٹورنامنٹ شیڈول کرنے پر سخت تنقید کا نشانہ بنایا جارہا ہے۔ فوٹو فائل

---

براڈ کاسٹنگ شیڈول نے ٹوئنٹی 20 ورلڈ کپ میں کرکٹ کو ہی مذاق بنا کر رکھ دیا۔ کسی بھی ایونٹ کی شیڈولنگ میں براڈکاسٹ ادارے کا اہم کردار ہوتا اور بعض اوقات اس کی وجہ سے منتظمین کو کئی مشکلات کا بھی سامنا کرنا پڑجاتا ہے۔

ایسا ہی کچھ گذشتہ دنوں سری لنکا اور جنوبی افریقہ کے درمیان میچ کے موقع پر ہوا، یہ مقابلہ 3 بجے شروع ہونا تھا مگر بارش کی وجہ سے ڈھائی گھنٹے تعطل کا شکار رہا۔

اس کے بعد دونوں ٹیموں صرف 7، 7 اوورز کھیلنے کو کہا گیا جو 10 وکٹوں کے ساتھ ایک مذاق سے کم نہیں، اسٹیڈیم شائقین سے بھرا ہوا تھا، اوورز کم کرنے کی وجہ مزید بارش کا خطرہ نہیں بلکہ ٹی وی شیڈول تھا، براڈکاسٹنگ ادارے کو کولمبو میں ساڑھے 7 بجے ایک اور میچ دکھانا تھا۔

ہزاروں روپے خرچ کرکے گرائونڈ آنے والے شائقین کو صرف 14 اوورز اور اپنی ٹیم کی شکست پر ہی اکتفا کرنا پڑا۔یاد رہے کہ ایونٹ کے کئی میچز بارش سے متاثر ہوئے ہیں، انٹرنیشنل کرکٹ کونسل کو اس موسم میں ٹورنامنٹ شیڈول کرنے پر سخت تنقید کا نشانہ بنایا جارہا ہے۔