انسٹنٹ میسجنگ ایپلی کیشن واٹس ایپ نے اینڈرائیڈ کے پرانے ورژن پر ایپ کی سپورٹ ختم کرنے کا اعلان کر دیا۔
میٹا کی ذیلی پلیٹ فارم کے اعلان کے مطابق 8 ستمبر 2026 سے ایپ ان ڈیوائسز پر کام کرنا بند کر دے گی جن میں اینڈرائیڈ 5.0 اور 5.1 چل رہے ہیں۔ واٹس ایپ کو فعال رکھنے کے لیے اینڈرائیڈ 6.0 ورژن کم از کم قرار دے دیا گیا ہے۔
اس فیصلے کا مقصد صارفین کو اپنا فون اپڈیٹ کرنے یا چیٹس بیک اپ بنانے کے لیے مہلت دینا ہے۔
واٹس ایپ بِیٹا انفو کے مطابق ستمبر 2026 سے واٹس ایپ صرف اینڈرائیڈ 6.0 یا اس سے جدید ورژنز پر ہی چلے گا اور پرانے سسٹمز کی سپورٹ ختم ہو جائے گی۔
رپورٹ میں ایک الرٹ اسکرین شاٹ بھی شیئر کیا گیا جس میں لکھا ہے ’اس سال کے آخر میں واٹس ایپ اس ڈیوائس پر کام نہیں کرے گا۔‘
بی بوم کے مطابق جو صارفین پرانا ورژن استعمال کرتے رہیں گے، وہ 8 ستمبر کے بعد میسجز بھیج یا وصول نہیں کر سکیں گے۔
