افغانستان میں فورسز کا آپریشن جھڑپیں 87 طالبان جنگجو اور 5 فوجی ہلاک درجنوں زخمی

ہلمند میں افغان فوجی نے 5 ساتھیوں کو زہر پلا کر گولیاں ماریں، افغان صدارتی الیکشن کے 63 فیصد ووٹوں کی گنتی مکمل۔ فوٹو: اے ایف پی

---

افغان نیشنل سیکیورٹی فورسز کے آپریشن اور جھڑپوں کے دوران 87 طالبان جنگجو ہلاک اور 54 زخمی ہوگئے۔

6 طالبان کو گرفتارکیا گیا، 28 نصب کی جانے والی ڈیوائسز اور سڑک کنارے نصب بم بھی قبضے میں لے کر ناکارہ بنا دیے گئے، جبکہ طالبان کے حملوں میں سڑک کنارے نصب بم پھٹنے سے5 افغان فوجی مارے گئے، افغان صوبہ ہلمند میں ایک پولیس اہلکار نے فائرنگ کرکے اپنے 5 ساتھی اہلکاروں کو موت کے گھاٹ اتار دیا، مقامی پولیس حکام کے مطابق واقعہ گریشک ضلع میں اس وقت پیش آیا، جب ایک پولیس اہلکار نے اپنے ساتھی اہلکاروں کو زہر پلانے کے بعد گولیاں مار کر ہلاک کر دیا۔

حملہ آور موقع سے فرار ہوگیا، صوبائی گورنر کے ترجمان نے اپنے بیان میں کہا ہے کہ واقعے کی تحقیقات شروع کر دی گئی ہیں، ہفتے کو افغان میڈیا کے مطابق وزارت داخلہ سے جاری بیان میں کہا گیا ہے کہ افغان نیشنل سیکیورٹی فورسز کے گزشتہ 24 گھنٹوں کے دوران صوبہ قندوز، زابل، لوگر، غزنی، پکتیکا اور گوہر میںکیے گئے آپریشن میں 37 طالبان جنگجو ہلاک اور37 زخمی ہو گئے، آپریشن افغان نیشنل آرمی، پولیس اور انٹیلی جنس این ڈی ایس نے مشترکہ طور پر کیا، آپریشن کے دوران افغان فورسز نے مختلف اقسام کے ہتھیار اور دھماکا خیز مواد بھی قبضے میں لے لیا، ادھر وزارت دفاع کے ترجمان جنرل ظاہر عظیمی نے ایک بیان میں کہا ہے کہ ملک بھر میں گزشتہ 48 گھنٹوں کے دوران مختلف حملوں میں 5 افغان فوجی ہلاک ہو گئے۔

ترجمان نے فوجیوں کی ہلاکت والے علاقوں کے بارے میں کوئی معلومات فراہم نہیں کیں، جنرل عظیمی کا کہنا تھا کہ گزشتہ 48 گھنٹوں میں افغان نیشنل آرمی کے آپریشن میں 25 طالبان جنگجو ہلاک اور17 زخمی ہوگئے۔

دوسری جانب صوبہ قندھار میں سیکیورٹی فورسز اور طالبان جنگجوؤں کے درمیان شدید جھڑپیں ہوئی ہیں، جس میں 25 طالبان جنگجو ہلاک ہوگئے، دریں اثنا افغانستان کے آزاد الیکشن کمیشن نے اعلان کیا ہے کہ صدارتی انتخابات میں ڈالے گئے 63 فیصد ووٹوں کے آڈٹ کا کام مکمل کر لیا گیا ہے، ہفتے کو افغان میڈیا کے مطابق آزاد الیکشن کمیشن کے ترجمان نور محمد نورکا کہنا ہے کہ صدارتی انتخابات میں ڈالے گئے ووٹوں کے آڈٹ کا کام تیزی سے جاری ہے اورآڈٹ ٹیمیں اب تک 14516 بیلٹ بکس کا آڈٹ کر چکی ہیں، ترجمان نے مزید کہا کہ کمیشن کو امید ہے کہ جعلی ووٹوں کو کالعدم قرار دینے کے عمل کا کام کل (پیر) سے شروع ہو جائے گا۔