چھت گرنے سے معمر شخص ہلاک کنویں میں گیس سے مزدور چل بسا

کورنگی بلال کالونی میں کنویں کی کھدائی کے دوران بے ہوش ہونے والے افراد کو باہر نکالنے کے لیے امدادی رضا کار کو کنویں کے اندر اتارا جارہا ہے۔ فوٹو: ایکسپریس

---

شہر کے مختلف علاقوں میں ٹریفک حادثات اور واقعات میں 4 افراد ہلاک اور2 زخمی ہوگئے، کورنگی میں کنویں میں گر کر ایک مزدور ہلاک جبکہ دوسرے کی تلاش جاری ہے۔

تفصیلات کے مطابق کورنگی سیکٹر 9 بلال کالونی بس اسٹاپ کے قریب واقع شیر محمد کے بھینسوں کے باڑے میں کنویں کی کھدائی کے دوران 2 مزدور 35 سالہ مشہود خان ولد حضرت خان اور 50 سالہ حضرت عمر ولد محمد یوسف زہریلی گیس سے بے ہوش ہوکر کنویں میں گر گئے، پولیس اور ریسکیو ادارے کو طلب کیا گیا، رضاکار ٹیم نے علاقہ مکینوں کی مدد سے 4 گھنٹے کی جدو جہد کے بعد 35 سالہ مشہود خان کی لاش نکال لی۔

پولیس کے مطابق اندھیرے کی وجہ سے حضرت عمر کو نکالنے میں مشکلات کا سامنا ہے، کنویں میں ڈوبنے والے دونوں مزدور 4 ماہ سے کنویں کی کھدائی کررہے تھے جس کی گہرائی 110 فٹ بتائی جاتی ہے، ڈوبنے والے دونوں مزدور کنویں میں پانی کے پائپ کی فٹنگ کیلئے نیچے اترے تھے دونوں مزدور سہراب گوٹھ کے رہائشی اور آبائی تعلق مہمند ایجنسی سے تھا۔

گلشن معمار ناردرن بائی پاس عباس کٹ کے قریب تیز رفتار گاڑی کی ٹکر سے موٹر سائیکل سوار 30 سالہ رب نواز ولد صدیق اور 32 سالہ محمد نواز ولد دینو زخمی ہوگئے زخمیوں کو طبی امداد کے لیے عباسی شہید اسپتال لے جایا گیا جہاں رب نواز دوران علاج زخموں کی تاب نہ لاتے ہوئے ہلاک ہوگیا جبکہ محمد نواز کی حالت تشویشناک ہے ہلاک اور زخمی ہونے والے افراد دوست اور نیو کراچی لاسی گوٹھ کے رہائشی تھے۔

شاہراہ پاکستان واٹر پمپ چورنگی کے قریب نامعلوم گاڑی کی ٹکر سے 24 سالہ فیصل رضا ولد سید رضا زخمی ہوگیا جسے طبی امداد کے لیے عباسی شہید اسپتال پہنچایا گیا، پاکستان بازار کے علاقے اورنگی ٹاؤن سیکٹر 14 مجاہد کالونی میں مکان کی بوسیدہ چھت گرنے سے 62 سالہ الیاس شیخ ولد شیخ جاوید ملبے کے نیچے دب کر ہلاک ہوگیا۔

متوفی کی لاش عباسی شہید اسپتال لائی گئی جہاں سے موت کی تصدیق کے بعد ورثا لاش پولیس کارروائی کے بغیر لے گئے، شیر شاہ کے علاقے میں نجی فیکٹری میں کام کے دوران بجلی کا کرنٹ لگنے سے 35 سالہ عامر ہلاک ہوگیا متوفی کی لاش عباسی شہید اسپتال لائی گئی جہاں سے موت کی تصدیق کے بعد ورثا اور فیکٹری کے افسران لاش پولیس کارروائی کے بغیر لے گئے۔