پاکستانیوں کی غیر قانونی دولت کا سراغ لگانے کے معاہدے کیلئے ایف بی آر ٹیم سوئٹزر لینڈ روانہ

سوئس بینکوں میں پاکستانیوں کے اکاؤنٹس میں نان ٹیکس آمدنی کے بارے میں معلومات، غیرقانونی دولت واپسی لائی جا سکے گی، ذرائع۔ فوٹو: فائل

---

سوئس بینکوں میں موجودپاکستانیوں کی دولت کاسراغ لگانے کے معاہدے کے لئے فیڈرل بورڈآف ریونیوکی ٹیم سوئس ٹیکس اتھارٹیز کے ساتھ مذاکرات کے لئے سوئٹزرلینڈروانہ ہوگئی ہے۔

ایف بی آر کے ترجمان شاہدحسین اسد نے ایکسپریس کوبتایا کہ فیڈرل بورڈآف ریونیوکی ٹیم منگل سے سوئس ٹیکس حکام کے ساتھ دہرے ٹیکسوں سے بچاؤ کے معاہدے میں ترامیم بارے مذاکرات شروع کریں گے اور معاہدے میں ترامیم کے تحت ایسی شقیں شامل کرنے پر بات چیت ہوگی جس کے تحت پاکستانی ٹیکس حکام سوئٹرز لینڈ کے بینکوں میں موجود پاکستانیوں کی دولت کے بارے میں معلومات حاصل کرسکے گی اورسوئس ٹیکس اتھارٹیز پاکستان میں موجود سوئس باشندوں کے بینک اکائونٹس کے بارے میں بھی معلومات حاصل کرسکے گی۔

شاہد حسین نے بتایا کہ ابھی ابتدا ہے یہ کچھ نہیں کہا جاسکتا کہ دونوں ممالک کے درمیان دہرے ٹیکسوں سے بچائوکے ترمیمی معاہدے پراتفاق کتنے عرصے میں ہوتا ہے اور اس کے لئے مذاکرات کے کتنے راونڈہونگے جبکہ اس بارے میں وزارت خزانہ ذرائع کاکہناہے کہ تنظیم برائے اقتصادی تعاون وترقی کے ممبر ہونے کے ناطے سوئٹزرلینڈ نے ممبرممالک کیساتھ سوئس بینکوں میں فرضی اوربے نام اکاؤنٹس میں پڑی دولت بارے معلومات شیئر کی جائیں اور اوای سی ڈی کی سفارش پرسوئٹزرلینڈنے (Return of Illicit Asset act) متعارف کروایاجس کے تحت جن ممالک کے سوئٹزرلینڈ کے ساتھ دوہرے ٹیکسوں سے بچاؤ کے معاہدے ہیں اور ان معاہدوں میں معلومات کے تبادلے کی کلاز شامل ہیں۔ انھیں متعلقہ ممالک کے باشندوں کے سوئس بینکوں کے اکاؤنٹس کے بارے میں معلومات کی فراہمی کولازمی قراردیا گیا ہے اوراسی کے تحت برطانیہ سمیت دیگرممالک سوئس بینکوں سے معلومات حاصل کررہے ہیں جبکہ انڈیابھی کوششیں کررہاہے۔

ذرائع نے بتایاکہ پاکستان نے بھی سوئٹزرلینڈکے ساتھ دہرے ٹیکسوں سے بچاؤ کے معاہدے میں ترمیم کرنیکافیصلہ کیاہے جس کے تحت سوئٹزرلینڈ اور پاکستان کے درمیان طے پانے والے دوہرے ٹیکسوں سے بچاؤ کے معاہدے (ٹریٹی)میں ترمیم کرکے دونوں ممالک کے ٹیکس دہندگان اور ان کے بینک اکائونٹس بارے معلومات کے تبادلے کے حوالے سے ایک شق شامل کی جائے جس کے لئے پاکستان کی طرف سے سوئس حکام کو باقاعدہ طور پر لیٹر لکھا گیا تھاجس پر پاکستانی ٹیم سوئٹزرلینڈ روانہ ہوئی ہے جوکل (منگل)سے سوئس حکام کیساتھ مذاکرات شروع کرے گی۔