کراچی:
گلستان جوہر گیسٹ ہاؤس کے باہر سے ملنے والی لاش نوجوان تاجر میر رضا کی ثابت ہوئی، لاش کے ڈی این اے سیمپل والدین سے میچ کرگئے۔
ایکسپریس نیوز کے مطابق سندھ فرانزک ڈی این اے لیبارٹری جامعہ کراچی نے گلستان جوہر سے ملنے والی لاش سے متعلق اپنی رپورٹ جاری کردی جس کے مطابق لاش نوجوان تاجر میر رضا کی ہے، لاش کے ڈی این اے سیمپل اس کے والدین کے ڈی این اے سے میچ کرگئے ہیں۔
نوجوان تاجر میر رضا کے قتل کے ہائی پروفائل کیس میں پولیس افسران کی جانب سے خدشہ ظاہر کیا گیا تھا کہ ممکن ہے ملنے والی لاش میر رضا کی نہ ہو اور کسی دوسری لاش کو چہرہ مسخ کرکے پھینک دیا گیا ہو۔
قتل کیس کی تحقیقات کے لیے کی گئی قبر کشائی کے بعد لاش کے ڈی این اے کے لیے بھی سیمپل حاصل کیے گئے تھے اور اب ڈی این اے رپورٹ نے یہ خدشہ دور کردیا ہے۔
قتل کیس کی رپورٹ 15 اگست تک جمع کروانے کا حکم
دریں اثنا جوڈیشل مجسٹریٹ شرقی نے نوجوان تاجر میر رضا قتل کیس کی رپورٹ 15 اگست تک جمع کروانے کا حکم دے دیا۔
جوڈیشل مجسٹریٹ شرقی کی عدالت کے روبرو نوجوان تاجر میر رضا قتل کیس کی سماعت ہوئی۔ کیس کا پرانا تفتیشی افسر پیش ہوا۔ تفتیشی افسر نے رپورٹ جمع کروانے کے لیے مہلت مانگ لی۔ تفتیشی افسر نے کہا کہ کیس کی تحقیقات جاری ہیں۔ اعلیٰ حکام نے مقدمے کے تفتیشی افسر کو تبدیل کردیا ہے۔ نئے تفتیشی افسر آئندہ سماعت پر پیش ہونگے۔ عدالت نے تفتیشی افسر کی استدعا منظور کرتے ہوئے 15 اگست تک رپورٹ جمع کروانے کا حکم دے دیا۔
