شہر قائد کے علاقے کورنگی چمڑا چورنگی قریب مزدا ٹرک کی ٹکر سے موٹر سائیکل سوار نوعمر لڑکا جاں بحق ہوگیا۔
ایکسپریس نیوز کے مطابق چمڑا چورنگی کے قریب کم عمر موٹرسائیکل سوار مزدا ٹرک کی ٹکر سے موقع پر جاں بحق ہوا جس کی لاش کو ضابطے کی کارروائی کیلیے جناح اسپتال منتقل کیا گیا۔
ریسکیو حکام کے مطابق متوفی کی شناخت 15 سالہ ساگر ولد رجب کے نام سے کی گئی۔ اس حوالے سے ایس ایچ او کورنگی صنعتی ایریا حکم داد نے بتایا کہ حادثہ مزدا ٹرک کی ٹکر سے پیش آیا تھا جس کے ڈرائیور کو پولیس نے گرفتار کر کے ٹرک کو قبضے میں لیکر تھانے منتقل کر دیا اور اس حوالے سے مزید تفتیش کا عمل جاری ہے۔
انھوں نے بتایا کہ متوفی لڑکا کورنگی کا رہائشی تھا جس کی لاش پولیس نے ضابطے کی کارروائی کے بعد ورثا کے حوالے کر دی۔
